Nëntëmbëdhjetë liderë evropianë bënë thirrje të premten për ngritjen e shpejtë të qendrave të kthimit të migrantëve në vende të treta, pas miratimit nga Parlamenti Evropian të rregullave të reja që synojnë të lehtësojnë dëbimin e personave që nuk kanë të drejtë të qëndrojnë në BE.
Në një letër të përbashkët, të iniciuar nga kryeministrja daneze Mette Frederiksen dhe kryeministrja italiane Giorgia Meloni, liderët kërkuan zbatimin e shpejtë të atyre që i përshkruan si “zgjidhje të zbatuara në vende të treta”.
“Tani duhet të tregojmë rezultate konkrete që bëjnë vërtet ndryshim për qytetarët tanë dhe të ecim sa më shpejt të jetë e mundur me zgjidhjet e zbatuara në vende të treta”, thuhet në letër, sipas Belgas, agjencisë kombëtare të lajmeve të Belgjikës.
Nisma vjen pas miratimit këtë javë nga Parlamenti Evropian të një rregulloreje të re për kthimet, e cila ofron një kornizë ligjore për shtetet anëtare që të negociojnë ngritjen e objekteve të tilla me vende jashtë BE-së.
Liderët përmendën qendrat e diskutueshme të Italisë në Shqipëri si shembull të atyre që i quajtën “zgjidhje inovative” dhe thanë se disa vende tashmë po shqyrtojnë marrëveshje të ngjashme.
“Vende të tjera aktualisht po punojnë për zhvillimin e mundësive të reja, përfshirë qendra në vende të treta”, thuhet në letër. “Ne do të marrim personalisht drejtimin për të siguruar që vizionet tona të bëhen realitet”.
Nënshkruesit gjithashtu i bënë thirrje Komisionit Evropian ta mbështesë nismën përmes financimit nga buxheti i BE-së.
Danimarka dhe Holanda janë ndër vendet që aktualisht janë të angazhuara në bisedime me shtete jashtë BE-së për ngritjen e këtyre qendrave.
Ndër vendet që nënshkruan letrën ishin Belgjika, Holanda, Polonia, Austria, Greqia dhe Hungaria.
Gjermania, Franca dhe Spanja nuk iu bashkuan nismës.
Paketa e reformës, e dakorduar përkohësisht mes Parlamentit Evropian dhe Këshillit të BE-së më 1 qershor, u miratua këtë javë me votim nga Parlamenti Evropian në përbërje të plotë.
Sipas rregullave të reja, vendimet e kthimit të lëshuara nga autoritetet kombëtare do t’i detyronin individët të largohen nga territori i një shteti anëtar menjëherë ose brenda një afati të caktuar.
Legjislacioni gjithashtu prezanton mundësinë e të ashtuquajturave “qendra kthimi” në vende të treta që janë të gatshme të presin të kthyerit, duke i përjashtuar të miturit e pashoqëruar, me kusht që marrëveshjet të përmbushin standardet e të drejtave të njeriut dhe detyrimet ligjore ndërkombëtare.
Përpjekjet e mëparshme për të krijuar qendra për migrantët e mundshëm në vende të treta kanë shkaktuar polemika dhe kritika, përfshirë skemën e dështuar me Ruandën të ish-qeverisë konservatore të Britanisë.
