Një sulm ajror izraelit ka shkaktuar dëme të mëdha në një zonë banimi në lagjen Umm Zuhair, në jug të Deir al-Balahut, në pjesën qendrore të Rripit të Gazës.

Sulmi shkatërroi dhjetëra ndërtesa dhe shkaktoi zjarre, duke detyruar ekipet e mbrojtjes civile të ndërhyjnë për shuarjen e flakëve. 

Sipas banorëve lokalë, ushtria izraelite kishte lëshuar një paralajmërim për evakuim para sulmit ndaj lagjes, ku ndodheshin rreth 150 shtëpi. Banorët thanë se shumë shtëpi u shkatërruan plotësisht, duke shkaktuar dëme të mëdha dhe panik në një zonë që më parë konsiderohej relativisht e sigurt, pavarësisht sulmeve të përsëritura. Izraeli vazhdon të shkelë marrëveshjen e armëpushimit, e cila është në fuqi që nga 10 tetori të vitit 2025. 

Që atëherë, sipas Ministrisë së Shëndetësisë në Gaza, shkeljet izraelite të armëpushimit kanë vrarë mbi 1.144 palestinezë dhe kanë plagosur 3.703 të tjerë. Ministria thekson se fushata ushtarake izraelite në Gaza, që nga tetori i vitit 2023, ka vrarë më shumë se 73.000 palestinezë dhe ka plagosur mbi 173.000 të tjerë, ndërsa ka shkaktuar shkatërrim të gjerë në rreth 90 për qind të infrastrukturës civile të enklavës.