Presidenti i Bjellorusisë, Aleksandër Lukashenko, dhe presidenti i Francës, Emmanuel Macron, zhvilluan të dielën një bisedë telefonike, gjatë së cilës diskutuan çështje rajonale dhe marrëdhëniet mes Bashkimit Evropian dhe Bjellorusisë.
Sipas një deklarate të shërbimit për shtyp të presidencës bjelloruse, telefonata u zhvillua me iniciativën e palës franceze.
“Dy liderët diskutuan çështje rajonale, si dhe marrëdhëniet mes Bjellorusisë dhe Bashkimit Evropian, përfshirë marrëdhëniet dypalëshe mes Minskut dhe Parisit”, thuhet në deklaratë.
Biseda shënon kontaktin e parë publik mes Lukashenkos dhe Macronit që nga 26 shkurti 2022, pak pas fillimit të luftës në Ukrainë.
Asnjëra palë nuk publikoi menjëherë detaje të tjera mbi përmbajtjen e diskutimeve.
