Një i dyshuar u vra të shtunën pasi dyshohet se hapi zjarr pranë kompleksit të Shtëpisë së Bardhë, sipas Shërbimit Sekret të ShBA-së.

Agjencia tha në një deklaratë se incidenti ndodhi pak pas orës 18:00 (22:00 GMT) pranë kryqëzimit të Rrugës së 17-të me Pennsylvania Avenue NW, jashtë territorit të Shtëpisë së Bardhë.

Autoritetet thanë se një person “nxori një armë nga çanta e tij dhe filloi të qëllonte” në zonë.

“Policia e Shërbimit Sekret iu kundërpërgjigj me zjarr, duke e goditur të dyshuarin, i cili u transportua në një spital të zonës ku u shpall i vdekur. Gjatë shkëmbimit të zjarrit u godit gjithashtu një kalimtar”, thuhet në deklaratë, duke shtuar se asnjë oficer nuk pësoi lëndime.

Gjendja e kalimtarit nuk ishte e njohur menjëherë.

Sipas një raporti të NBC News, që citon gjashtë zyrtarë të lartë të zbatimit të ligjit të informuar mbi hetimin, i dyshuari u identifikua si Nasire Best.

Zyrtarët thanë për NBC News se Best, 21 vjeç, kishte një histori të dokumentuar me autoritetet lokale. Pesë zyrtarë të tjerë të lartë të zbatimit të ligjit thanë gjithashtu se ai kishte histori problemesh të shëndetit mendor.

Best ishte akuzuar më parë për hyrje të paligjshme pasi dyshohet se kishte hyrë në një zonë të kufizuar pranë Shtëpisë së Bardhë më 10 korrik. Sipas dokumenteve gjyqësore, ai kishte deklaruar se ishte Jezu Krishti dhe kishte thënë se dëshironte të arrestohej.

Shërbimi Sekret konfirmoi se presidenti Donald Trump ndodhej brenda Shtëpisë së Bardhë në momentin e incidentit, megjithëse “as personat nën mbrojtje dhe as operacionet nuk u prekën”.

ABC News, duke cituar një zyrtar të Shtëpisë së Bardhë, raportoi se në kohën e të shtënave Trump ndodhej në Zyrën Ovale duke punuar me këshilltarët Steven Cheung, Natalie Harp, Margo Martin dhe të tjerë.

Sipas raportimeve mediatike, Shërbimi Sekret e informoi Trumpin për incidentin.

'Veprim i shpejtë dhe profesional'

Trump falënderoi Shërbimin Sekret dhe forcat e rendit dhe bëri thirrje për rritjen e masave të sigurisë.

“Falënderoj Shërbimin tonë të shkëlqyer Sekret dhe forcat e rendit për veprimin e shpejtë dhe profesional të ndërmarrë këtë mbrëmje kundër një personi të armatosur pranë Shtëpisë së Bardhë, i cili kishte një histori të dhunshme dhe një obsesion të mundshëm me strukturën më të dashur të vendit tonë”, shkroi Trump në platformën e tij Truth Social.

Presidenti tha se personi i armatosur u vra gjatë shkëmbimit të zjarrit me agjentët e Shërbimit Sekret pranë portave të Shtëpisë së Bardhë.

Trump përmendi gjithashtu shqetësime më të gjera të sigurisë, duke e lidhur incidentin me ngjarje të mëparshme dhe duke bërë thirrje për masa më të forta mbrojtëse për administratat e ardhshme.

“Ky incident ndodh vetëm një muaj pas të shtënave gjatë darkës së Shoqatës së Korrespondentëve të Shtëpisë së Bardhë dhe tregon sa e rëndësishme është që presidentët e ardhshëm të kenë hapësirën më të sigurt dhe më të mbrojtur të këtij lloji që është ndërtuar ndonjëherë në Uashington. Siguria kombëtare e vendit tonë e kërkon këtë!”, tha ai.

Shërbimi Sekret njoftoi se incidenti po hetohet.

Motivi i të shtënave nuk dihet ende.

Drejtori i FBI-së, Kash Patel, tha se agjencia e tij ndodhet në vendngjarje dhe po mbështet Shërbimin Sekret.

Departamenti i Policisë së Uashingtonit (DC Police) tha gjithashtu se po merr pjesë në hetim.

Bllokimi i përkohshëm i Shtëpisë së Bardhë u hoq më vonë.