Косовската претседателка Вјоса Османи изјави дека, и покрај предизвиците, патот на Косово кон НАТО и Европската Унија (ЕУ) е незапирлив.

Османи, во интервју за британскиот медиум „Монокл“, зборуваше за евроатлантската интеграција и развојниот потенцијал на Косово. Таа рече дека ориентацијата на Косово останува јасна кон евроатлантската алијанса.

„Сто проценти сме усогласени со надворешната и безбедносната политика на ЕУ, вклучително и санкциите против Русија, бидејќи веруваме дека во тешки времиња она што таа го претставува и ставот што го зазема се одлучувачки“, рече таа.

Според неа, европската демократија не е совршена, но е најдобро функционален систем.

Османи рече дека Косово е единствената земја на Западен Балкан без статус на кандидат, но дека останува на тој пат.

„Иако извештаите на ЕУ нè наведуваат како главен реформатор во владеењето на правото, човековите права, демократијата и економскиот развој, напредокот од нивна страна е недоволен. Но, нашето трпение нема да исчезне, бидејќи ова е поважно. Застанувањето на евроатлантските вредности е дел од нашиот историски идентитет. Ќе останеме на овој пат. Нема да флертуваме со други сили и се надеваме дека ќе ги инспирираме и другите“, рече Османи.

Таа изјави дека во овој момент, Косово тесно соработува со администрацијата на американскиот претседател Доналд Трамп за да види како можат да го прошират овој однос надвор од дипломатијата и традиционалните политички ангажмани.

Таа додаде дека верува оти Косово ги исполнува сите услови за да биде пожелна дестинација за американските бизниси.