Македонскиот премиер Христијан Мицкоски во Минхен каде е дел од годишната безбедносна конференција, по средбата со Антониот Кошта претседателот на Европскиот совет порача дека земјата е посветена на членството во ЕУ но, без понатамошни билатерални условувања.

„Јасно ја пренесов нашата позиција дека Македонија останува посветена на европскиот пат. Но, исто така, Македонија заслужува достоинствен и принципиелен процес, базиран на европски вредности, а не на билатерални условувања“, напиша Мицкоски.

Тој дополни дека „отворено и искрено разговарале за европската перспектива на Македонија“, како и за спроведувањето на реформите и предизвиците што стојат на патот кон полноправно членство во Европската Унија.

„Нашата Влада работи на суштински реформи: владеење на правото, борба против корупцијата, економска стабилност и подобар животен стандард за граѓаните. Европската иднина не е само политичка цел, таа е избор за подобра држава“, порача Мицкоски.