Вредноста на трговијата меѓу Европската Унија и Соединетите Американски Држави достигнала рекордни 875 милијарди евра минатата година и покрај растот на трговските тензии и царини, покажа анализа на Германскиот институт за економија (ИВ).

Сепак, според извештајот објавен денеска, вкупните резултати маскираат сериозни проблеми во одредени сектори.

Извозот на ЕУ во САД се зголеми за 7,7%, на 580 милијарди евра, додека увозот на американска стока во ЕУ се зголеми за 2,2 %, на 295 милијарди евра, што го донесе трговскиот суфицит на Унијата на речиси 285 милијарди евра.

На прв поглед, рекордниот обем на трговија може да укаже дека царините воведени од американскиот претседател Доналд Трамп, како и политичките тензии, не ги оштетиле економските односи, но економистката на ИВ, Замина Зултан, оцени дека таков впечаток е погрешен.

Таа истакна дека одредени сектори веќе страдаат од значителни последици од царините, првенствено европската автомобилска индустрија.

Извозот на автомобили и автоделови од Европската Унија во Соединетите Американски Држави се намали во текот на 2025 година за 20,4 проценти.

Германија, која учествува со речиси две третини од целиот извоз на автомобили од ЕУ на американскиот пазар, забележа пад од 18,9 проценти.

Трансатлантската размена на услуги, исто така, достигна рекордно ниво, кое изнесуваше 865 милијарди евра, но ЕУ имаше дефицит од 178 милијарди евра во таа категорија.

Повеќе од 40 проценти од увозот на услуги во САД беше поврзан со такси за интелектуална сопственост, вклучувајќи софтверски лиценци, патенти и трговски марки, при што нивната вредност се зголеми за 13,7 проценти.

Спротивно на тој тренд, Ирска го зголеми извозот во САД за 52,7%, благодарение на бесцаринските фармацевтски производи и хемикалии.

Ирска е европско седиште на голем број американски фармацевтски и технолошки компании, како што се компании што произведуваат лекови, медицински производи и хемикалии.

Поради ова, голем дел од нивното производство формално се управува како ирски извоз во САД.