Вршителот на должноста претседател Албулена Хаџиу распиша предвремени парламентарни избори во Косово за 7 јуни, во одлука што ја објави денеска.

На прес-конференција, Хаџиу рече дека ја донела одлуката откако ги проценила уставните рокови, организациските потреби на Централната изборна комисија (ЦИК) и важноста на што е можно пошироко учество на граѓаните во изборниот процес.

„Сега одговорноста е на сите, институциите да организираат уреден, транспарентен и кредибилен процес, политичките субјекти да се натпреваруваат одговорно и со почит кон граѓаните, а граѓаните да го одредат идниот правец на земјата со својот слободен глас“, рече Хаџиу.

На прашањето дали нејзиното име ќе биде вклучено во изборната трка во рамките на Движењето Самоопределување, со оглед на функцијата, таа одговори дека ќе ги усогласи сите свои дејствија со Уставот и законот.

„Можам да бидам кандидат, на органите на Движењето Самоопределување е да одлучат за тоа“, додаде таа.

Мнозинството од косовските парламентарни политички партии, за време на состанокот со Хаџиу, изразија поддршка за одржување на изборите на 7 јуни, датум претходно предложен од Централната изборна комисија.

Членовите на косовското собрание не успеаја да изберат нов претседател до 28 април, рокот утврден од Уставниот суд, што ја натера земјата да влезе во процес на одржување предвремени парламентарни избори во рок од 45 дена.