Високо квалитетно млеко во текот на целата година од специфична раса на овци со шпанско потекло. Ова можете да го најдете кај Велче Црвенов од велешко Новачани. Приказната на Велче со чувањето овци започнала пред три години по неговото враќање од Швајцарија каде заминал на печалба. Немал никакво искуство со овчарството. Овци чувал единствено таткото на неговата сопруга.
Семејството не сакало да се пресели во Швајцарија. Затоа и тој решил да се врати.
„Не се пронајдов јас во тој свет. Фамилијава не сакаа да дојдат таму. Викаат ај тато врати се во Македонија, не е лошо и тука има живот. Викам јас ако се вратам во Македонија имам друг план, сакам овци да си чувам”, вели Велче.
Планот набргу му се реализирал. Во близина на местото каде некогаш таткото на неговата сопруга чувал овци, тој ја направил новата штала во што му помогнала млекарницата „Бучен Козјак” каде има обезбеден пласман на млекото. Заедно со сопругата го започнале семејниот бизнис. На почетокот имале 27 овци, а сега имаат близу 200.
Се одлучил за овци од расата Асаф кои бараат шталско чување. Една овца при молзење дава околу два литри млеко дневно.
„Прво и основно ни беше намерата да обезбедиме ваква раса на животни за да можеме дома да си ги гледаме. Овие бараат малку подобра храна, поголемо внимание околу здравјето, нормално условите ако се добри, вода да имаат пред нив и нормално овцата знае да ве награди”, изјави Црвенов.
Млекото се молзе и обработува по највисоки стандарди.
„Млекото се молзе машински. Светлина не гледа млекото. Директно од овцата, од вимето, директно си оди право во лактофризер. Со двеста грла овци едно четиричлено семејство мислам дека комотно можат да живеат, ако се сите ангажирани” објаснува Црвенов.
Велче ги охрабрува и младите да влезат во овој бизнис. Има и еден апел до граѓаните.
„Ако може да ги користат македонските производи. Со тоа можат многу да помогнат на земјоделците и на сточарите. Ќе знаат и што јадат и дека е посвежо и поквалитетно А со тоа ќе се зголеми и сточниот фонд, а и државата ќе има бенефит” вели Велче.
