Францускиот претседател Емануел Макрон денеска во Париз изјави дека Црна Гора може да смета на целосна политичка поддршка од Франција во последните фази од преговорите со Европската Унија, за време на средбата со премиерот Милојко Спајиќ во Елисејската палата.

Макрон ги пофали резултатите од реформите на Црна Гора и оцени дека земјата „работи одлично“, нагласувајќи дека нејзиниот напредок е охрабрување за другите земји-кандидатки за членство во ЕУ.

„Успехот на Црна Гора им дава надеж на другите и покажува дека проширувањето на Европската Унија е можно“, рече Макрон.

За време на средбата беа потврдени блиските и пријателски односи меѓу двете земји, со акцент на зајакнување на политичката, економската и стратешката соработка, како и силна експертска поддршка од Франција во последната фаза од процесот на пристапување.

Спајиќ нагласи дека Црна Гора е најнапредниот кандидат за членство во ЕУ, со 14 привремено затворени поглавја од преговорите, а останатите се во последната фаза.

„Не сакаме кратенки, туку фер евалуација на резултатите. Во време на геополитички предизвици, Црна Гора може да биде заедничка победа за политиката на проширување“, рече Спајиќ.

Соговорниците ја изразија својата заедничка посветеност кон целта за затворање на сите преговарачки поглавја до крајот на 2026 година, со цел Црна Гора да биде подготвена за членство во ЕУ до 2028 година, соопшти Владата на Црна Гора.

Средбата се одржа пред Самитот ЕУ-Западен Балкан, кој ќе се одржи во Црна Гора на 5 јуни, а на кој ќе присуствува францускиот претседател, што ќе биде негова прва посета на земјата.

Беше разговарано и за регионалната стабилност, улогата на Црна Гора во Берлинскиот процес, како и соработката во рамките на НАТО и справувањето со геополитичките предизвици.

Фокусот беше ставен и на конкретни проекти за соработка, вклучувајќи го и најавеното потпишување на договор за изградба на Универзитетската клиника во Црна Гора, како и иницијативи во областите на енергетиката, одбраната, сајбер безбедноста, екологијата и инфраструктурата.

Беше нагласена и важноста од подобрување на воздушната поврзаност помеѓу Подгорица и Париз и зајакнување на соработката во туризмот.