Британскиот премиер Енди Бурнам изјави дека преиспитувањето на односите на Велика Британија со Европската Унија (ЕУ) би можело да помогне во обединувањето на луѓето, истовремено нагласувајќи дека одлуката за евентуално повторно вклучување во Унијата треба да ја донесат британските граѓани.
Во денешното интервју за емисијата „Добро утро Британија“ на ИТВ, Бурнам рече дека би сакал Обединетото Кралство повторно да ѝ се придружи на ЕУ во текот на неговиот живот, но нагласи дека нема да им ги наметнува своите лични ставови на граѓаните.
„Реков- ќе бидам искрен- дека би сакал да видам тоа да се случи во текот на мојот живот, но нема да одам пред граѓаните. Нема да ги наметнувам сопствените ставови. Мора да се погрижите британските граѓани да бидат тие што одлучуваат“, рече тој.
На прашањето дали се гледа себеси како премиер кому му е судено да ја врати Британија во ЕУ, Бурнам одговори: „Искрено, не.“
Тој рече дека негов приоритет е прагматичен пристап кон предизвиците со кои се соочува земјата, додавајќи: „Сметам дека моја задача е да бидам прагматичен во однос на целата ситуација. Може ли да ги подобрам работите? Може ли да придонесам за раст на британската економија?“
Бурнам ги отфрли сугестиите дека повторно ја отвора дебатата за референдумот за Брегзит, со што наводно би го прекршил ветувањето дадено за време на кампањата за дополнителните избори во изборната единица Мејкерфилд.
Наместо тоа, тој повторно го истакна својот став дека Велика Британија треба да ги преиспита договорените односи со ЕУ по Брегзит, велејќи дека сегашното решение не функционира.
Тој, исто така, оцени дека попрактична и поотворена дискусија за Брегзит би можела да помогне во надминувањето на политичките и општествените поделби што опстојуваат од референдумот во 2016 година.
„Ако повторно се навратиме на Брегзит и разговараме за него на попрактичен начин, ако бидеме искрени за тоа, тоа може да почне да ги обединува луѓето што гласале различно“, рече тој.
„Поделбите низ кои поминавме во изминатата деценија навистина мора да завршат и треба да ги обединиме луѓето.“
Бурнам рече дека разгледувањето на односите на Обединетото Кралство со Европа е неопходно за да ѝ се даде јасна насока на земјата.
„Се обидувам да ѝ дадам насока на земјата, а тоа е невозможно без повторно да се навратам на односите со Европа и да кажам: ‘Погледнете, еве неколку можности како да ги поставиме работите правилно’.“
Тој повторно ја отфрли можноста да се залага за повторно приклучување кон ЕУ пред следните општи избори.
Исклучена можноста за предвремени избори
За време на интервјуто Бурнам ги отфрли и шпекулациите за предвремени општи избори, велејќи дека нема да има избори „во скоро време“.
На прашањето дали ја подготвува јавноста за предвремени избори, тој одговори: „Не, ја исклучив таа можност.“
Запрашан дали тоа е конечна одлука, Бурнам рече дека јасно го изнел својот став уште пред конференцијата на Лабуристичката партија.
„Едноставно, не мислам дека луѓето сакаат уште една расправија за минатото. Мислам дека сакаат да си ја работам работата“, рече тој.
Водителите повторно го отворија прашањето кон крајот на интервјуто, по што Бурнам повтори дека предвремените избори не се дел од неговите планови.
„Не размислувам за тоа [предвремени избори]. Не знам дали тоа се пренесува како таков впечаток, но навистина не размислувам за тоа. Нема да има избори во скоро време. Луѓето може слободно да ја отфрлат таа можност од своите мисли“, рече тој.
