Индиректните разговори меѓу САД и Иран во Оман денеска завршија без ниедна страна да направи големи отстапки.

Двете страни не се сретнаа лице в лице, туку наизменично водеа разговори преку омански дипломати, при што ниту една страна не се помести од својата почетна позиција за време на разговорите, изјавија за „Волстрит журнал“ луѓе запознаени со дискусиите.

Oстанува нејасно како дискусиите влијаеле врз пошироките напори за постигнување дипломатско решение за нуклеарната програма на Иран, бидејќи очекувањата пред состанокот веќе беа ниски меѓу регионалните функционери и аналитичарите, се додава во извештајот.

Иранскиот министер за надворешни работи, Абас Арагчи, ги опиша разговорите во петокот како „добар почеток“, велејќи дека тие би можеле да продолжат ако се надмине атмосферата на недоверба. Тој рече дека е договорено процесот да продолжи и дека страните би можеле повторно да се состанат во Мускат подоцна.

Оманскиот министер за надворешни работи, Бадр Албусаиди, рече дека разговорите биле „многу сериозни“, помагајќи да се разјаснат позициите на двете страни и да се идентификуваат областите за можен напредок.

Иран и САД ја продолжија индиректната нуклеарна дипломатија во петокот по недели зголемени тензии, поттикнати од заканата на американскиот претседател Доналд Трамп за воена акција против земјата.