Policia në qytetin Liezhë (Liege) të Belgjikës ka arrestuar 107 persona gjatë protestave studentore që nga fillimi i tetorit, thanë sot autoritetet lokale. 

Arrestimet përfshinin 80 arrestime administrative dhe 27 arrestime gjyqësore, tha policia, siç citohet nga agjencia e lajmeve Belga. Vetëm të martën, policia arrestoi 53 persona, përfshirë 46 në mënyrë administrative dhe shtatë në mënyrë gjyqësore, pasi të rinjtë u mblodhën në rrugët përreth Universitetit të Liezhës.

Disa protestues dëmtuan prona dhe vunë zjarre, tha policia.

Studentët dhe nxënësit në të gjithë sistemin arsimor frëngjishtfolës të Belgjikës kanë organizuar protesta për disa ditë me radhë për shkak të kostos në rritje të arsimit të lartë dhe biletave të transportit publik si dhe mungesës së vendeve në disa klasa, orareve të mbipopulluara dhe vështirësive në sigurimin e materialeve të kursit.

Sot, studentët u mblodhën në mënyrë paqësore jashtë shkollës "Athenee Leonie de Waha" në Liezhë. Protestat pritet të vazhdojnë gjatë gjithë ditës.

Lëvizja në Belgjikë erdhi ndërsa nxënësit e shkollave të mesme franceze kanë bllokuar hyrjen dhe kanë organizuar protesta jashtë shkollave të tyre për disa ditë, duke kërkuar kushte më të mira mësimore.