Gjiganti turk i industrisë së mbrojtjes, ASELSAN, regjistroi rritje reale prej 25 për qind të të ardhurave, duke arritur në 1,8 miliard dollarë (88,5 miliardë lira turke) gjatë gjashtë muajve të parë të vitit. Rritja u nxit nga kontratat e reja dhe investimet në kapacitetet prodhuese dhe kërkimore, njoftoi kompania të martën.

Gjatë gjysmës së parë të vitit, kompania nënshkroi kontrata të reja me vlerë 4,9 miliardë dollarë, 72 për qind më shumë krahasuar me të njëjtën periudhë të vitit të kaluar.

Vlera e përgjithshme e porosive të papërfunduara u rrit me 45 për qind, në 23,2 miliardë dollarë, duke pasqyruar kërkesën e lartë vendase dhe ndërkombëtare për produktet e saj të mbrojtjes.

ASELSAN-i i rriti me 195 për qind investimet për zgjerimin e kapaciteteve dhe shkallës së prodhimit, duke i çuar ato në 323 milionë dollarë. Ndërkohë, shpenzimet për kërkim dhe zhvillim, të përqendruara në teknologji kritike si informatika kuantike dhe sistemet nënujore, u rritën me 41 për qind, duke arritur në 804 milionë dollarë.

Raporti i borxhit neto ndaj EBITDA-s, fitimit para interesit, tatimeve, zhvlerësimit dhe amortizimit, ra nga 0,57 në 0,55.

Sipas raportit financiar, marzhi EBITDA u rrit me 120 pikë bazë, duke arritur në 26,3 për qind, ndërsa EBITDA-ja e përgjithshme arriti në 488 milionë dollarë.

Fluksi operacional i parasë i gjigantit të mbrojtjes arriti në 319,7 milionë dollarë gjatë gjysmës së parë të vitit, ndërsa kompania ruajti një raport të kapitalit të vet prej 56 për qind, dukshëm mbi mesataren e sektorit.

Qendrat e reja të prodhimit dhe testimit, me një sipërfaqe të përgjithshme prej 17.360 metrash katrorë, të vëna së fundmi në funksion, do t’u kushtohen municioneve inteligjente dhe sistemeve të mbrojtjes, duke mbështetur zgjerimin e kompanisë.

ASELSAN-i vuri në funksion edhe 19 linja robotike automatizimi për ta përmirësuar shpejtësinë e dorëzimit dhe cilësinë e prodhimit.

Drejtori ekzekutiv, Ahmet Akyol, tha se disiplina financiare do t’i mundësojë kompanisë të investojë në kapacitetet e së ardhmes, duke ruajtur njëkohësisht një bilanc të fortë financiar.

Vlera e përgjithshme e porosive të papërfunduara të ASELSAN-it pritet ta kalojë pragun prej 30 miliardë dollarësh duke filluar nga viti i ardhshëm.

Kompania nisi këtë vit edhe projekte civile, përfshirë teknologjitë e sinjalizimit për linjën plotësisht autonome të metrosë më të shpejtë në Evropë dhe një pajisje të re për kirurgjinë me zemër të hapur, sipas raportit.

ASELSAN-i theksoi gjithashtu përfshirjen në listën “Forbes Global 2000”, duke u bërë kompania e parë dhe e vetme turke e industrisë së mbrojtjes që arrin këtë vlerësim.