Legjenda portugeze e futbollit, Luis Figo, i kërkoi të mërkurën presidentit të FIFA-s, Gianni Infantino, të japë dorëheqjen, duke e akuzuar se ka vendosur interesat personale përpara futbollit.
“Sot u bashkohem zërave të tjerë nga bota e futbollit dhe i bëj thirrje Gianni Infantinos të japë dorëheqjen nga posti i presidentit të FIFA-s”, shkroi Figo në X.
Ish-ylli i Real Madridit dhe Barcelonës kritikoi drejtimin e Infantinos pas dështimit të një propozimi të diskutueshëm për t’u shitur investitorëve privatë një pjesë e aksioneve në veprimtaritë e FIFA-s, përfshirë Kupën e Botës.
“Infantino e ka zhvlerësuar postin që premtoi ta lartësonte. Ai ka gënjyer, mashtruar dhe është përpjekur të përfitojë personalisht në kurriz të lojës së cilës duhet t’i shërbejë”, tha Figo.
“Ai ka humbur mbështetjen e zyrtarëve të lartë, këshilltarëve më të afërt, shumicës dërrmuese të njerëzve që ia kushtojnë jetën këtij sporti dhe madje, me sa duket, edhe të fituesit të Çmimit të Paqes të FIFA-s”, shtoi ai.
“Është tepër vonë për ta shpëtuar dinjitetin e tij, por jo për ta shpëtuar futbollin. Ai duhet të largohet. Tani”.
Thirrja e Figos shton presionin në rritje ndaj Infantinos, i cili, sipas raportimeve të mediave, zhvilloi të mërkurën në Rabat të Marokut një takim urgjent me zyrtarë të lartë të FIFA-s për planin e braktisur të investimeve.
Takimi pasoi kritikat ndaj propozimit nga UEFA, CONCACAF-i dhe organizata të tjera të futbollit. Edhe zyrtarë të lartë të FIFA-s dhe figura të njohura, përfshirë shefin e Zhvillimit Global të Futbollit në FIFA, Arsene Wenger, u distancuan nga plani.
Plani i pezulluar i FIFA-s për investimet në Kupën e Botës
FIFA njoftoi javën e kaluar se planifikonte të krijonte një kompani vartëse me vlerë 20 miliardë dollarë, e cila do të administronte operacionet tregtare dhe organizimin e Kupës së Botës dhe garave të tjera të saj.
Propozimi parashikonte që investitorëve të jashtëm t’u ofrohej deri në 20 për qind e aksioneve në kompaninë e quajtur FIFA Forward Enterprise, duke siguruar potencialisht deri në 4,2 miliardë dollarë.
FIFA më pas e tërhoqi planin pas kundërshtimeve nga federatat, konfederatat, ligat, klubet dhe tifozët.
UEFA e përshëndeti të shtunën tërheqjen, duke thënë se propozimi ishte refuzuar unanimisht nga federatat e saj kombëtare dhe ishte kundërshtuar nga shumë federata e konfederata të tjera në mbarë botën.
Organi drejtues i futbollit evropian deklaroi se udhëheqja aktuale e FIFA-s ka humbur besimin e një pjese të madhe të komunitetit të futbollit dhe kërkoi që përgjegjësit për propozimin të identifikohen dhe të mbajnë përgjegjësi.
Mediat britanike raportuan të hënën se UEFA e kishte kërcënuar Infantinon me veprime ligjore për planin e braktisur dhe e kishte paralajmëruar të mos shkatërronte dokumente apo materiale të tjera që lidhen me të.
