Departamenti amerikan i Shtetit ka lëshuar një paralajmërim global për qytetarët amerikanë, duke theksuar se tensionet e shtuara në Lindjen e Mesme mund të çojnë në zhvillime të papritura të sigurisë, ndërprerje të udhëtimeve dhe kërcënime të mundshme ndaj interesave amerikane jashtë vendit.

“Për shkak të tensioneve të shtuara në Lindjen e Mesme, situata e sigurisë mbetet e ndërlikuar, me mundësi për përshkallëzim të paparashikuar”, thuhet në paralajmërimin e departamentit.

Amerikanëve që ndodhen aktualisht në Lindjen e Mesme iu kërkua të tregohen vigjilentë dhe të përgatiten për anulime të mundshme të fluturimeve, mbyllje të përkohshme të hapësirës ajrore dhe ndërprerje të tjera të udhëtimeve.

Departamenti u bëri thirrje qytetarëve amerikanë të ndjekin paralajmërimet e sigurisë të lëshuara nga ambasadat dhe konsullatat amerikane, të zbatojnë udhëzimet e autoriteteve vendore dhe të qëndrojnë të informuar përmes raportimeve të mediave.

“Amerikanët jashtë Lindjes së Mesme duhet të rishqyrtojnë udhëtimet drejt rajonit ose kalimin përmes tij”, shtoi departamenti.

“Objektet diplomatike amerikane, përfshirë ato jashtë Lindjes së Mesme, janë vënë në shënjestër. Irani dhe grupet që e mbështesin atë mund të synojnë interesa të tjera amerikane jashtë vendit ose vende të lidhura me Shtetet e Bashkuara dhe qytetarët amerikanë në mbarë botën”, thuhet në deklaratë.

Tensionet rajonale janë përshkallëzuar që kur ShBA-ja dhe Izraeli nisën në shkurt një luftë të përbashkët kundër Iranit.

Irani u kundërpërgjigj me sulme me dronë dhe raketa ndaj vendeve të Gjirit që strehojnë asete amerikane.

ShBA-ja dhe Irani nënshkruan muajin e kaluar një memorandum mirëkuptimi të ndërmjetësuar nga Pakistani, për t’i dhënë fund konfliktit dhe për të arritur një marrëveshje të qëndrueshme paqeje. Megjithatë, tensionet u përshkallëzuan sërish javën e kaluar për shkak të Ngushticës së Hormuzit, ndërsa të dyja palët shkëmbyen sulme.