Sekretari i përgjithshëm i OKB-së, Antonio Guterres, u ka bërë thirrje qeverive të përmbushin angazhimet e tyre ndaj Objektivave të Zhvillimit të Qëndrueshëm (SDGs), duke paralajmëruar se konfliktet, ndryshimet klimatike, pabarazia dhe borxhi në rritje po pengojnë zhvillimin global.
Duke iu drejtuar aktivitetit “SDG Moment” në selinë e OKB-së në Nju Jork, Guterres tha se objektivat përfaqësojnë një angazhim të përbashkët të qeverive për të ndërtuar shoqëri më të shëndetshme, më të sigurta dhe më të begata.
“Premtimet që qeveritë bënë kur i miratuan Objektivat nuk po mbahen. Është koha që ato të përmbushen”, tha ai.
Guterres theksoi përparimin e arritur që nga miratimi i objektivave SDGs, përfshirë uljen e vdekshmërisë së fëmijëve dhe nënave, parandalimin e miliona infektimeve me HIV dhe zgjerimin e qasjes në arsim, mbrojtje sociale, ujë të pijshëm të sigurt, kanalizime, energji elektrike, energji të rinovueshme dhe internet.
Megjithatë, ai tha se këto arritje janë shoqëruar me pengesa të mëdha, veçanërisht me pandeminë globale COVID-19, e cila “zhduku vite të tëra përparimi dhe nxori në pah dobësi të thella”.
“Përmes çdo krize, ne u përshtatëm. Mësuam. Dhe vazhduam të ecim përpara”, tha ai, duke theksuar se përparimi në zhvillim është arritur falë vendosmërisë së njerëzve, komuniteteve dhe vendeve.
“Zhvillimi përballet me pengesa të fuqishme”
Guterres tha se zhvillimi tani përballet me “pengesa të fuqishme”, duke përmendur konfliktet, ndarjet dhe mosbesimin që po dobësojnë bashkëpunimin ndërkombëtar.
Ai theksoi krizat e vazhdueshme në Lindjen e Mesme dhe gjetkë, të cilat po nxisin pasigurinë ekonomike dhe po pengojnë rrjedhën e ushqimit, energjisë dhe tregtisë.
Shefi i OKB-së ngriti gjithashtu shqetësime për kërcënimet ndaj të drejtave të grave dhe vajzave, si dhe për presionet financiare me të cilat përballen vendet në zhvillimGuterres përcaktoi katër fusha në të cilat qeveritë duhet të intensifikojnë përpjekjet për të përmbushur angazhimet e tyre ndaj objektivave SDGs.
E para është luftimi i pabarazisë përmes investimeve në arsim cilësor, siguri ushqimore, punë të denjë, mbulim universal shëndetësor dhe sisteme të fuqishme të mbrojtjes sociale, ndëras prioriteti i dytë është mbrojtja e planetit.
Ai tha se energjia e rinovueshme është bërë burimi më i lirë dhe me rritjen më të shpejtë të energjisë së re në pjesën më të madhe të botës dhe bëri thirrje që vendeve të pasura me burime të rinovueshme t’u sigurohen mjetet e nevojshme për të prodhuar energji të pastër, për të prodhuar teknologji të pastra dhe për të krijuar vende pune të denja.
Guterres e identifikoi financimin e zhvillimit të qëndrueshëm si prioritetin e tretë.
“Vendet janë zotuar të forcojnë mobilizimin e burimeve të brendshme dhe t’i drejtojnë burimet në fushat me nevojat më të mëdha. Por nevojitet shumë më tepër”, tha ai.
Prioriteti i katërt, tha Guterres, është përshpejtimi i përparimit përmes të dhënave më të mira, parashikimit strategjik, teknologjisë dhe ndërlidhjes.
Guterres pranoi se objektivat SDGs janë ambicioze për shkak të përmasave të sfidave me të cilat përballet bota, por tha se ambicia duhet të shoqërohet me veprime.
“Angazhimet duhet të shoqërohen me veprime transformuese”, tha ai.
“Ky është premtimi që qeveritë bënë. Mbajtja e këtij premtimi është një detyrim. Është gjithashtu mundësia jonë më e madhe për të ndërtuar një botë më të drejtë, më të sigurt dhe më të qëndrueshme”, shtoi ai.
Objektivat SDGs, të miratuara nga vendet anëtare të OKB-së si një kornizë e përbashkët globale, synojnë të trajtojnë varfërinë, urinë, pabarazinë, shëndetin, arsimin, ndryshimet klimatike dhe sfida të tjera të zhvillimit, duke siguruar që askush të mos mbetet pas.
