Përgjigjja e Iranit ndaj çdo sulmi të ardhshëm të ShBA-së do të jetë "asimetrike" dhe "shumështresore" pasi sulmet e fundit amerikane kanë ndryshuar llogaritjet e sigurisë dhe doktrinën e mbrojtjes të Teheranit, tha sot zëvendëspresidenti i parë, Mohammad Reza Aref, transmeton Anadolu.
"Krimet e fundit të ShBA-së kundër kombit iranian kanë ndryshuar llogaritjet tona të sigurisë dhe doktrinën e mbrojtjes. Që tani e tutje, përgjigjja jonë do të jetë asimetrike, me shumë shtresa dhe do të synojë privimin e sigurisë nga agresori", tha Aref në një postim në X.
Ai paralajmëroi për pasojat ekonomike për Uashingtonin. "Amerikanët duhet të mendojnë për grumbullimin e benzinës dhe karburantit. Muaj të errët e presin ekonominë amerikane", tha ai.
Aref nuk shtjelloi se çfarë masash mund të marrë Teherani në përgjigje të një sulmi të ardhshëm të SHBA-së ose se si ato mund të ndikojnë në furnizimet me karburant të ShBA-së dhe ekonominë më të gjerë.
Vërejtjet e tij erdhën në mes të ripërtëritjes së luftimeve të drejtpërdrejta midis Iranit dhe ShBA-së dhe shqetësimeve të shtuara për furnizimet me energji dhe transportin përmes Ngushticës së Hormuzit, një rrugë kyç për dërgesat globale të energjisë.
Përshkallëzimi i fundit filloi pasi një sulm i ShBA-së në ishullin Larak të Iranit më 30 gusht i dha fund një qetësie afërsisht njëmujore në armiqësitë e drejtpërdrejta.
Irani që atëherë ka lëshuar raketa dhe dronë kundër objekteve ushtarake amerikane në të gjithë rajonin, përfshirë bazat në Kuvajt dhe Emiratet e Bashkuara Arabe.
Teherani ka mbajtur kufizime në lundrimin përmes Ngushticës së Hormuzit, duke e lidhur rihapjen e tij me përmbushjen e angazhimeve të Washingtonit sipas një mirëkuptimi të mëparshëm midis dy palëve.
Ndërkohë, ShBA-ja ka intensifikuar presionin ekonomik mbi Teheranin përmes "Operation Economic Outcast", duke i synuar të ardhurat e Iranit nga nafta dhe linjat e tjera financiare të shpëtimit së bashku me operacionet e vazhdueshme ushtarake.
