Dita e parë e raundit të shtatë të negociatave mes Libanit dhe Izraelit në Romë u përqendrua te çështjet kufitare dhe mekanizmat për verifikimin e zbatimit të marrëveshjeve të sigurisë, tha të martën për Anadolu një zyrtar i lartë libanez.
“Përfundoi dita e parë e raundit të shtatë të negociatave me Izraelin, ndërsa diskutimet e pasdites u ndanë në dy takime, një ushtarak dhe një politik”, deklaroi zyrtari.
Në takimin politik, palët diskutuan çështjen e kufirit, ndërsa Libani paraqiti qëndrimin e tij. Sipas zyrtarit, diskutimet pritet të vazhdojnë të mërkurën.
Gjatë takimit ushtarak, pjesëmarrësit i shqyrtuan mekanizmat për verifikimin e zbatimit të marrëveshjeve të sigurisë, përfshirë tërheqjen e Izraelit, armët e Hezbollahut dhe palën e tretë që do ta mbikëqyrë procesin.
“Libani ende nuk ka marrë përgjigje nga udhëheqja politike izraelite lidhur me angazhimin e saj ndaj armëpushimit”, tha zyrtari.
Ky është rasti i dytë që Roma i pret negociatat, të cilat janë planifikuar të zgjasin tri ditë. Pesë raundet e mëparshme u zhvilluan në Uashington, si pjesë e një procesi negociator të ndërmjetësuar nga ShBA-ja.
