Platforma e mediave sociale Snapchat do të ishte "e gatshme të zbatojë" kufizime kohore për përdoruesit adoleshentë, tha të mërkurën Evan Spiegel, drejtori ekzekutiv i kompanisë së saj mëmë Snap.

Duke folur për BBC-në në selinë e kompanisë në Kaliforni, Spiegel tha se kufizimi i kohës që përdoruesit e rinj mund të kalojnë në aplikacion mund të jetë "një hap i rëndësishëm përpara për industrinë".

"Kjo është diçka për të cilën kemi folur brenda kompanisë", tha ai, pa u zotuar për një afat kohor. "Nuk kam më shumë çfarë të ndajë sot", shtoi ai.

Komentet e tij pasuan thirrjet e Meta-s për kompanitë e tjera të mediave sociale që të miratojnë kufizime të ngjashme me ato që ra dakord t‘i prezantonte sipas një marrëveshjeje shumëmiliardëshe me ShBA-në.

Sipas marrëveshjes së gushtit, Meta pranoi të paguante 12,7 miliardë dollarë dhe të vendoste një limit të paracaktuar dyorësh ditor për përdoruesit adoleshentë në të gjitha platformat e saj, të heshtte njoftimet gjatë orarit të shkollës dhe të kufizonte aksesin gjatë natës.

"Mendoj se kjo do të ishte e dobishme në përgjithësi", tha Spiegel për BBC-në duke theksuar se "Ne i kemi shqyrtuar me shumë kujdes kushtet".

Meta tha se do të vendosë kufizime më të rrepta kohore dhe do të paguajë 5,3 miliardë dollarë shtesë nëse YouTube dhe TikTok do të ndjekin shembullin. Ajo mohoi çdo shkelje si pjesë e marrëveshjes.

Muajin e kaluar, një zëdhënës i Meta-s shprehu shpresën se Snap do të miratonte masa të ngjashme. Spiegel shtoi se Qendra Familjare e Snap-it tashmë u jep prindërve mjete për të monitoruar aspekte të përdorimit të Snapchat-it nga adoleshentët e tyre.

"Ne duam të kuptojmë se si mund të jemi pjesë e zgjidhjes", shtoi ai.

Paditë kundër Meta-s, YouTube-s, TikTok-ut dhe Snap-it akuzojnë kompanitë për dëmtimin e shëndetit mendor të të rinjve përmes platformave të tyre. Snap është akuzuar gjithashtu për lehtësimin e shitjeve të paligjshme të drogës.