Prodhuesit kryesorë evropianë të automjeteve, Volkswagen, Renault dhe Stellantis, i kanë bërë thirrje Bashkimit Evropian të zbatojë kritere të reja “Made in Europe”, sipas të cilave të paktën 70 për qind e vlerës së një automjeti duhet të krijohet brenda vendeve anëtare të BE-së. 

Qëllimi i nismës është mbrojtja e bazës industriale evropiane nga presionet globale, por ajo rrezikon të dëmtojë si prodhuesit turq ashtu edhe ata evropianë, paralajmëroi një përfaqësues i sektorit.

Mehmet Ali Yalçındağ, kryetar koordinues i Bordit të Marrëdhënieve Ekonomike me Jashtë (DEİK), tha për Anadolu se Bashkimi Doganor 30-vjeçar e ka bërë Türkiyen një pjesë të domosdoshme të zinxhirëve evropianë të furnizimit dhe të krijimit të vlerës në industrinë automobilistike.

Ai tha se klasifikimi i Türkiyes si një “vend i tretë”, i kufizuar në 30 për qind të kuotës së mbetur, do të prishte planet ekzistuese të biznesit dhe do të ulte kapacitetin prodhues rajonal.

Yalçındağ theksoi se gjysma e autobusëve që qarkullojnë në rrugët evropiane prodhohen në Türkiye dhe se përfshirja e vendit në skemën e re të origjinës “Made in Europe” do t’i mundësonte BE-së të ruante qendra prodhimi me kosto më të ulët dhe cilësi të lartë, duke krijuar një situatë fituese për të dyja palët.

“Ekzistojnë mundësi të rëndësishme bashkëpunimi mes Türkiyes dhe Evropës jo vetëm në sektorin e automjeteve, por edhe në energji, mbrojtje, zinxhirë furnizimi, digjitalizim dhe tranzicionin e gjelbër. Për këtë arsye, në vend që të diskutojmë apo kundërshtojmë hapa që mund të çojnë në prapakthim në fushat ku kemi bërë përparim, duhet të mbrojmë arritjet ekzistuese dhe të ndërtojmë mbi to”, tha ai.

“Ne nuk do të mirëpresim asnjë propozim alternativ nga BE-ja që përjashton Türkiyen dhe do të vazhdojmë aktivitetet tona lobuese në çdo platformë me vendet e BE-së në këtë drejtim”, shtoi Yalçındağ.

Nisma e prodhuesve evropianë vjen në një kohë kur Komisioni Evropian po punon për stimuj të rinj industrialë dhe mekanizma lokalizimi në kuadër të “Aktit të Përshpejtimit Industrial”.

Të tre prodhuesit, të cilët së bashku përfaqësojnë mbi 60 për qind të prodhimit të automjeteve në BE, argumentojnë se industria evropiane e automobilave po përballet me presion të fortë konkurrues global dhe se nevojiten stimuj të rinj, sipas një letre të përbashkët drejtuar Parlamentit Evropian dhe institucioneve të BE-së.

Në letër thuhet se aplikimi i etiketës “Made in Europe” për automjetet e shitura në Evropë duhet të bazohet në rregulla të përbashkëta në gjithë bllokun, si zhvillimi i automjetit në Evropë dhe realizimi i projektimit inxhinierik dhe prodhimit brenda BE-së, si dhe të përfshihet në llogaritjen e raportit mes përmbajtjes vendase dhe asaj të huaj në një automjet.