Kompania turke e mbrojtjes Aselsan ka nënshkruar një kontratë me vlerë 905 milionë dollarë me Presidencën e Industrive të Mbrojtjes së Türkiyes (SSB) për furnizimin me sisteme të mbrojtjes ajrore.
Aselsan njoftoi të martën se marrëveshja përfshin sisteme të projektuara për të forcuar aftësitë e mbrojtjes ajrore të vendit.
Kontrata pritet të mbështesë programin “Steel Dome”, një arkitekturë shumë-shtresore e mbrojtjes ajrore e zhvilluar nën koordinimin e SSB-së si një sistem vendas që integron të gjithë komponentët e mbrojtjes ajrore.
“Steel Dome” është projektuar për t'i neutralizuar kërcënimet ajrore në të gjitha lartësitë dhe distancat.
Sistemi përfshin disa shtresa mbrojtjeje, duke filluar nga elementë me kosto të ulët për mbrojtjen në lartësi të ulëta kundër tufave të dronëve dhe mjeteve ajrore pa pilot kamikaze, deri te sistemet si Korkut dhe Gürz, si dhe radarë që operojnë në lartësi të ndryshme.
Sistemet Hisar përbëjnë shtresën e mesme të arkitekturës, ndërsa Siper pozicionohet në shtresën e sipërme.
Forcimi i “Steel Dome”
Aselsan tha se “Steel Dome” bashkon sisteme të ndryshme armësh për mbrojtjen ajrore, radarë, zgjidhje elektro-optike, module komunikimi, qendra komanduese dhe kontrolli, si dhe aftësi të inteligjencës artificiale.
Kompania po zhvillon gjithashtu sistemin Hakim, një zgjidhje e avancuar komanduese dhe kontrolli që synon të koordinojë të gjithë komponentët e “Steel Dome”, së bashku me sistemet e sensorëve dhe komunikimit.
Sipas Aselsanit, aftësia e mbrojtjes ajrore të Türkiyes po ndërtohet mbi përvojën teknologjike të kompanisë të grumbulluar gjatë më shumë se pesë dekadave.
Siper 2 përfundon testin e qitjes
Ndërkohë, versioni i ri i sistemit me rreze të gjatë veprimi Siper, i quajtur Siper 2, përfundoi me sukses testin më të fundit të qitjes.
“Sistemi rajonal i mbrojtjes ajrore dhe raketore me rreze të gjatë veprimi Siper 2, i bazuar në arkitekturë të shpërndarë dhe me rëndësi strategjike, shkatërroi me sukses një objektiv manovrues”, shkroi në rrjetet sociale presidenti i Industrive të Mbrojtjes së Türkiyes, Haluk Görgün.
Ai shtoi se Siper 2 do të operojë në distanca dhe lartësi më të mëdha krahasuar me Siper 1, duke luajtur një rol më efektiv në mbrojtjen ajrore dhe raketore.
