Policia sllovake ka parandaluar një sulm të planifikuar me zjarrvënie ndaj një objekti për prodhimin e dronëve në lindje të vendit dhe ka ngritur akuza ndaj tre shtetasve të huaj, raportuan të martën mediet lokale.

Të dyshuarit janë akuzuar për përgatitjen e një vepre penale veçanërisht të rëndë që rrezikon sigurinë publike, duke vepruar, sipas akuzave, së bashku në emër të një pale tjetër, tha transmetuesi sllovak TA3.

Policia ka thënë se një sulm i tillë mund të kishte shkaktuar zjarr në përmasa të mëdha, të kishte rrezikuar jetë njerëzish dhe të kishte shkaktuar dëme materiale në vlerë prej dhjetëra milionë eurosh.

Rreth 70 punonjës mund të ndodheshin brenda objektit të prodhimit në kohën kur ishte planifikuar sulmi.

Gjatë operacionit, autoritetet kanë sekuestruar një sasi të madhe të një substance ndezëse, mjete pune, telefona celularë, një kamerë aksioni dhe një plan të objektit të vizatuar me dorë.

Një ekzaminim paraprak mjekoligjor e ka identifikuar substancën si përzierje benzine dhe polistireni, e njohur zakonisht si napalm.

Dy të dyshuar janë ndaluar në Sllovaki, ndërsa një hetues ka kërkuar masën e paraburgimit për ta.

I dyshuari i tretë është arrestuar nga autoritetet gjermane në bazë të një urdhërarresti evropian të lëshuar me procedurë të përshpejtuar.

Nuk u raportuan të lënduar apo dëme materiale si pasojë e ndërhyrjes së policisë.