Një numër rekord prej 129 gazetarësh dhe punonjësish të medias u vranë në mbarë botën vitin e kaluar, ndërsa Izraeli është përgjegjës për dy të tretat e totalit global, tha sot Komiteti për Mbrojtjen e Gazetarëve (KMG).

Komiteti me seli në Nju Jork tha se viti 2025 ishte viti më vdekjeprurës për mediat, me shumicën e të vrarëve që ishin gazetarë dhe punonjës të mediave palestineze të vrarë nga Izraeli në Rripin e Gazës.

"Gazetarët janë vrarë në numër rekord në një kohë kur qasja në informacion është më e rëndësishme se kurrë", tha në një deklaratë drejtoresha ekzekutive e KMG-së, Jodie Ginsberg.

"Sulmet ndaj mediave janë tregues kryesor i sulmeve ndaj lirive të tjera. Duhet bërë shumë më tepër për të parandaluar këto vrasje dhe për të ndëshkuar autorët. Ne të gjithë jemi në rrezik kur gazetarët vriten për raportimin e lajmeve", theksoi ajo.

KMG-ja vuri në dukje se më shumë se tre të katërtat e vdekjeve të gazetarëve në vitin 2025 kanë ndodhur në zonat e konfliktit. Komiteti vuri në dukje një rritje në përdorimin e dronëve për të vrarë gazetarë vitin e kaluar, me 39 gazetarë të vrarë nga dronët, përfshirë 28 gazetarë në Gaza nga ushtria izraelite.

KMG-ja tha se vitin e kaluar nëntë gazetarë u vranë në Sudan dhe katër në Ukrainë. "Shifrat janë ende shumë të ulëta krahasuar me Izraelin, i cili mbetet një përjashtim i rëndësishëm", thuhet më tej.

Komiteti tha se numri në rritje i vdekjeve të gazetarëve "ushqehet nga një kulturë e vazhdueshme e pandëshkueshmërisë", me shumë pak hetime transparente të kryera në 47 rastet e vrasjeve të synuara të gazetarëve në vitin 2025.

"Askush nuk është mbajtur përgjegjës në asnjë nga rastet", njoftoi komiteti duke paralajmëruar se dështimi i vazhdueshëm i udhëheqësve qeveritarë për të mbrojtur mediat ose për të mbajtur sulmuesit e tyre përgjegjës "hedh themelet për më shumë vrasje, përfshirë në vendet që nuk janë në luftë".

KMG-ja bëri thirrje për reforma rrënjësore në mënyrat se si qeveritë hetojnë vrasjet e gazetarëve "në mënyrë që autorët të sillen para drejtësisë, përfshirë krijimin e një grupi hetimor ndërkombëtar dhe vendosjen e sanksioneve të synuara".

Ushtria izraelite ka vrarë më shumë se 72 mijë palestinezë, kryesisht gra dhe fëmijë dhe ka plagosur mbi 171 mijë të tjerë në Gaza në një ofensivë dyvjeçare që nga tetori i vitit 2023.

Sulmi u ndalua sipas një armëpushimi të mbështetur nga ShBA-ja që hyri në fuqi më 10 tetor. Pavarësisht armëpushimit, forcat izraelite kanë kryer qindra shkelje përmes granatimeve dhe të shtënave me armë zjarri, duke vrarë të paktën 615 persona dhe duke plagosur mbi 1.600 të tjerë, sipas Ministrisë së Shëndetësisë së Gazës.

Izraeli gjithashtu ka përshkallëzuar sulmet e tij në Bregun Perëndimor të pushtuar që nga lufta në Gaza, duke vrarë të paktën 1.112 palestinezë dhe duke plagosur rreth 11.500 të tjerë gjatë së njëjtës periudhë.