Kryeministri i Irakut, Ali al-Zaidi, diskutoi të hënën bashkëpunimin në fushën e sigurisë me komandantin ushtarak gjerman Gunher Schneider, si dhe përgatitjet për tërheqjen përfundimtare nga Iraku të koalicionit ndërkombëtar të udhëhequr nga ShBA-ja.
Sipas një deklarate të publikuar nga zyra e al-Zaidit, kryeministri priti në Bagdad Schneiderin, komandantin e forcave gjermane të dislokuara jashtë vendit, dhe delegacionin që e shoqëronte.
Në takim u diskutuan marrëdhëniet dypalëshe në fushën e sigurisë dhe zbatimi i “programeve të përbashkëta”, që e synojnë “përmirësimin e performancës dhe efikasitetit të Forcave të Armatosura të Irakut”, thuhet në deklaratë.
Të dyja palët diskutuan gjithashtu përgatitjet për tërheqjen e afërt të forcave të koalicionit të udhëhequr nga ShBA-ja nga Iraku, ndërsa al-Zaidi theksoi nevojën për kalimin drejt “marrëdhënieve shumëdimensionale” me partnerët e koalicionit.
Kryeministri e vlerësoi gjithashtu “rolin e kahershëm të Gjermanisë në mbështetjen e Irakut në luftën kundër terrorizmit, veçanërisht gjatë periudhës së përballjes me anëtarët e organizatës terroriste DEASh/ISIS”.
Në fillim të këtij muaji, al-Zaidi konfirmoi se misioni i koalicionit në Irak do të përfundojë më 30 shtator, duke e cilësuar afatin si “përfundimtar dhe të pakthyeshëm”.
Në shtator të vitit 2024, Bagdadi dhe Uashingtoni ranë dakord për një plan me dy faza për përfundimin e misionit të koalicionit pas një dislokimi dhjetëvjeçar.
Faza e parë, e planifikuar fillimisht për shtatorin e kaluar, përfshinte tërheqjen e personelit të koalicionit, dorëzimin e bazave dhe kalimin drejt partneriteteve dypalëshe në fushën e sigurisë.
Faza e dytë, e cila zgjat deri në shtator të këtij viti, i lejon misionit të koalicionit në Sirinë fqinje të vazhdojë duke përdorur një bazë ajrore në qytetin Erbil, në veri të Irakut.
Koalicioni i udhëhequr nga ShBA-ja, në të cilin bëjnë pjesë vende si Gjermania, Franca dhe Spanja, u krijua në vitin 2014 për të luftuar DEASh-in, pasi organizata terroriste pushtoi territore të gjera në Irak dhe Siri.
Në dhjetor të vitit 2017, kryeministri i atëhershëm irakian, Haider al-Abadi, shpalli fitoren ndaj DEASh-it pas tre vjetësh luftimesh intensive.
Megjithatë, organizata vazhdon të kryejë sulme sporadike në provincat veriore, perëndimore dhe lindore të Irakut, ndërsa forcat irakiane vijojnë operacionet e sigurisë kundër qelizave të mbetura të DEASh-it, të cilat raportohet se janë ende aktive në vend.
