Ministri turk i Tregtisë, Ömer Bolat, u takua në Romë me përfaqësues të biznesit italian dhe me zëvendëskryeministrin Antonio Tajani për ta diskutuar forcimin e tregtisë dypalëshe dhe lidhjeve në prodhim.

Bolat tha të premten në platformën turke të rrjeteve sociale NSosyal se takimi i tryezës së rrumbullakët u përqendrua te zinxhirët e integruar të furnizimit në sektorë kyç, përfshirë industrinë automobilistike, aviacionin, mbrojtjen, energjinë, logjistikën, prodhimin, tekstilet dhe makineritë.

Ai theksoi se Türkiye dhe Italia nuk janë vetëm partnerë tregtarë, por pjesë të rëndësishme të një ekosistemi të përbashkët prodhues, veçanërisht në industrinë automobilistike.

Duke nënvizuar rolin e Türkiyes në kuadër të Bashkimit Doganor me BE-në, Bolat tha se ruajtja e rrjeteve të fuqishme të prodhimit është thelbësore për konkurrueshmërinë si të Türkiyes, ashtu edhe të Evropës.

Në takim u diskutuan gjithashtu mundësitë për sipërmarrje të përbashkëta në vende të treta dhe për bashkëpunim më të thellë në fusha si energjia e gjelbër, digjitalizimi, hapësira, prodhimi i avancuar dhe shëndetësia.

Investimet e drejtpërdrejta italiane në Türkiye kanë arritur në 4 miliardë dollarë përmes 1.645 kompanive, ndërsa investimet turke në Itali kanë kaluar 1 miliard dollarë.

Bolat shtoi se Türkiye dhe Italia, si dy partnerë strategjikë historikë, do të vazhdojnë ta thellojnë partneritetin e tyre ekonomik plotësues.