Иран одговори на изјавите на американскиот претседател Доналд Трамп за повторното отворање на Ормускиот теснец, со порака дека овој стратешки пловен пат нема да биде отворен додека не бидат прифатени условите на Техеран.

Управата на пловниот пат во Персискиот Залив објави соопштение на социјалната мрежа „Икс“, со седиште во САД, во кое ги отфрли тврдењата на американските официјални лица дека е укината иранската блокада на Ормускиот теснец.

„Повторените изјави на американските официјални лица и објавите на социјалните мрежи за укинување на иранската блокада на Ормускиот теснец не ги менуваат фактите. Ормускиот теснец и понатаму е затворен и нема повторно да биде отворен додека не бидат прифатени условите на Иран“, се наведува во соопштението.

Американскиот претседател Доналд Трамп претходно изјави дека Соединетите Американски Држави имаат целосна контрола врз Ормускиот теснец.

„САД имаат целосна контрола врз Ормускиот теснец. Мислам дека и ќе ја задржиме“, напиша Трамп во објава на социјалните мрежи.

Ормускиот теснец претставува клучен поморски премин меѓу Персискиот и Оманскиот Залив и е еден од најважните светски правци за транспорт на енергенси.