Бројот на загинати во силниот земјотрес со јачина од 7,4 степени што вчера ја погоди Колумбија се искачи на најмалку 169, при што се урнати објекти и започнати се големи спасувачки операции во повеќе градови, објавија локалните медиуми денес.

Најмалку 570 лица се повредени во земјотресот, соопшти Колумбиската асоцијација на главни градови.

Според медиумите, најтешко се погодени градовите Кали и Перејра.

Претседателот Абелардо де ла Есприела вчера изјави дека во земјотресот биле оштетени 1.575 домови, од кои 37 целосно се уништени, како и 61 објект, 18 здравствени центри, 52 образовни центри, 17 центри во заедницата и 18 патишта.

Колумбиската Влада прогласи состојба на национална катастрофа со цел да се зајакнат мобилизацијата и координацијата на институционалните капацитети за справување со вонредната состојба.

Земјотресот се случил во 7:34 часот по локално време, со епицентар на околу 5 километри источно од градот Сан Хосе дел Палмар, според податоците на Американскиот геолошки институт (USGS).

Институтот соопшти дека земјотресот се случил на длабочина од 107 километри.

Земјотрес со јачина од 5,0 степени бил регистриран во 8:18 часот, на околу 16 километри западно од Сан Хосе дел Палмар. Општината, која се наоѓа во департманот Чоко, има околу 4.800 жители и се наоѓа на надморска височина од 1.288 метри.