Со мотото „Отвори прозорец кон нови светови“ од 23 до 29 април во арената „Борис Трајковски“ во Скопје ќе се одржува 38. Саем на книга, чие отворање годинава се совпаѓа со Светскиот ден на книгата и авторското право.

Во текот на седумте саемски денови организатприте од Скопски саем очекуваат 30 000 посетители, повеќе од 130 промоции на наслови и автори, како и присуство од над 60 издавачки куќи. Најавена е богата програма со специјални попусти и промоции на нови изданија, средби со автори, книжевни панели и интерактивни работилници.

„Саемот на книгата останува еден од најзначајните културни настани, кој ја обединува публиката од целата земја и од странство, ја поттикнува читачката култура и создава простор за поврзување меѓу авторите, издавачите и читателите. Во последните години особено се забележува зголемено присуство на младата генерација, која сè повеќе се враќа кон хартиената форма на книгите и придонесува кон високата посетеност на настанот“, се наведува во соопштението.

Работното време на Саемот на книга е од 10 до 20 часот. Со секоја купена редовна влезница за саемот ќе бидат донирани средства на СОС Детско село.

Саемот на книга и оваа година е поддржан од Министерството за култура и туризам. Саемот е свечено отворен вчера во 13 часот во присуство на неговите организатори и претставници на издавачките куќи, градоначалникот на Скопје, Орце Ѓорѓиевски. Саемот, за официјално отворен го прогласи претседателката на државата Гордана Сиљановска-Давкова.