Гренланд не е на продажба, изјави денес премиерот на тој арктички остров, Јенс-Фредерик Нилсен, откако американскиот претседател Доналд Трамп за време на самитот на НАТО во Анкара го повтори своето барање да ја преземе контролата врз територијата.
„Гренланд не е на продажба. Честите повици за преземање или контрола врз нашата земја не го менуваат тоа“, напиша Нилсен во објава на Фејсбук, објави Ројтерс.
Еден ден откако Трамп го повтори своето барање САД да ја преземат контролата врз Гренланд, данскиот министер за надворешни работи Ларс Локе Расмусен изјави дека Данска сè уште е во дипломатски разговори со Гренланд и САД, но дека исходот од преговорите сè уште не е познат.
Трамп претходно изјави дека Гренланд треба да биде под контрола на Соединетите Американски Држави, а не на Данска, и оцени дека спорот околу Гренланд ги оштетил односите меѓу САД и НАТО.
„Тоа е она што ги оштети моите односи со НАТО, бидејќи Гренланд не е од корист за Данска“, рече Трамп и истакна дека Данска не инвестира доволно пари за навистина да му помогне на Гренланд иако е „опкружен со кинески и руски бродови“.
Претходно денес, норвешкиот министер за одбрана Торе Сандвик изјави дека сојузниците што ги следат активностите на Русија на далечниот север веќе спроведуваат конкретни мерки за безбедноста на Арктикот, односно на Гренланд.
