Српската министерка за рударство и енергетика, Дубравка Ѓедовиќ Хандановиќ, денес го потпиша договорот за партнерство меѓу Србија, Француската електроенергетска компанија (EДФ) и Француската агенција за развој (АФД) со што официјално започна првата фаза од развојот на нуклеарната програма во Србија.

Со договорот се обезбедува поддршка на Србија во развојот на професионални, кадровски и организациски капацитети и подготовката на соодветни студии за развој на нуклеарната програма.

Министерката изјави дека минатата година EДФ ја завршил подготовката на Прелиминарната техничка студија во оваа област, како и дека во рамките на првата фаза од нуклеарната програма се планирани уште три студии, додека другите 14 ќе бидат предмет на понатамошно разгледување со разни меѓународни компании кои имаат потребно искуство.

„За нас е многу важно што во оваа фаза од нашата нуклеарна програма, во која ги поставуваме темелите за нуклеарната енергија во нашата земја, ќе можеме да ги искористиме нивните знаења, искуство и ресурси, што ќе им биде од голема корист на експертите од Националното тело за спроведување на Програмата за развој на нуклеарна енергија (НЕПИO). Најважниот дел од овој проект се однесува на развојот на стратегијата за развој на човечките ресурси, како еден од клучните предуслови за започнување на национална нуклеарна програма. Персоналот претставува највреден елемент во развојот на нуклеарна програма во секоја земја, а една од нашите најважни задачи ќе биде создавање база на инженери и друг персонал кој ќе може одговорно и професионално да управува со нуклеарните постројки во Србија во иднина“, рече Ѓедовиќ Хандановиќ во Владата на Србија.

Според министерката, целта е да се завршат сите студии до средината на следната година, што ќе овозможи да се донесе информирана одлука за понатамошниот развој на нуклеарната програма.

„Во годините што претстојат, Србија мора да биде подготвена во институционална, регулаторна и професионална смисла за избор на технологија, а Србија би можела да ја добие својата прва нуклеарна централа по 2040 година“, рече Ѓедовиќ Хандановиќ.

Француската компанија за електрична енергија EДФ е водечки глобален оператор на нуклеарни централи, со повеќе од 50 нуклеарни реактори само во Франција.

Француската агенција за развој (AДФ) обезбеди грант во износ од 500.000 евра, што е нивно прво учество во областа на развојот на нуклеарни програми.

Преку проект имплементиран во рамките на фондот ФЕЕКСTE, тие ќе обезбедат поддршка на EДФ во градењето професионални и организациски капацитети во Србија како дел од подготовките за подготовка, развој и имплементација на Фаза I и Фаза II од нуклеарната програма.

Програмата има за цел подобрување на знаењето и искуството на персоналот вклучен во нуклеарната програма.

Главните активности вклучуваат зајакнување на компетенциите на институциите и професионалните тимови, развој на кадровските капацитети, развој на вештини за проекти и управување, подобрување на безбедносната култура, како и стекнување на техничко знаење потребно за донесување информирани одлуки, во согласност со препораките на Меѓународната агенција за атомска енергија (МААЕ).