Државниот секретар на Соединетите Американски Држави, Марко Рубио, денес им порача на американските сојузници во Персискиот Залив дека нивните безбедносни и економски интереси ќе бидат земени предвид во секој иден договор со Иран, со што се сака да се ублажат загриженостите на регионалните партнери во врска со прелиминарниот договор меѓу САД и Иран постигнат минатата недела.

Зборувајќи на состанокот на министрите за надворешни работи и претставници на земјите од Заливот во главниот град на Бахреин, Рубио рече дека Вашингтон бара траен мир со Иран, но нема да преземе чекори што би можеле да ја загрозат безбедноста и просперитетот на сојузниците во регионот богат со енергија, објави Ројтерс.

„Нема да направиме ништо што би ја поткопало безбедноста на нашите сојузници, нашите долгогодишни партнери во регионот“, рече Рубио.

Средбата се одржа во Бахреин, каде што е базирана Петтата флота на американската морнарица, а претседаваше министерот за надворешни работи на Бахреин, Абдулатиф бин Рашид Ал Зајани.

Тој ја поздрави одлуката на Оман да воспостави коридор за безбедно минување на бродови низ Ормускиот Теснец.

Тридневната турнеја на Рубио низ земјите од Персискиот Залив е првата дипломатска мисија на високо ниво откако САД и Иран постигнаа рамковен договор за прекин на конфликтот што започна на 28 февруари со нападите на САД и Израел врз Иран, забележува Ројтерс.

Сите членки на Советот за соработка во Персискиот Залив, Саудиска Арабија, Катар, Оман, Обединетите Арапски Емирати, Бахреин и Кувајт, се стратешки сојузници на САД и за време на конфликтот обезбедија разни форми на логистичка поддршка на Вашингтон, а во исто време беа изложени на ирански ракетни напади.