Германската влада може да побара одобрение од Бундестагот за воена мисија во Ормутскиот теснец пред летната парламентарна пауза, изјави денеска германскиот канцелар Фридрих Мерц.
Зборувајќи за новинарите на маргините на самитот на Г7 во Франција, Мерц рече дека Германија го поддржува рамковниот договор меѓу Соединетите Американски Држави и Иран и се подготвува да придонесе во операциите за деминирање и обезбедување безбедна пловидба низ Ормутскиот теснец.
„Летниот одмор на германскиот парламент започнува по првата недела од јули. Тоа значи дека ни претстојат уште две редовни работни недели на Бундестагот во кои би можеле да го разгледаме ова прашање“, рече Мерц.
Тој додаде дека таквиот воен ангажман ќе бара склучување на мировен договор меѓу САД и Иран, како и меѓународен правен мандат.
Германскиот брод за деминирање „Фулда“ и бродот за логистичка поддршка „Мосел“ веќе се распоредени во Источниот Медитеран, каде учествуваат во воени вежби.
