Уште еден пациент почина како последица на Западнонилска треска, со што бројот на смртни случаи од болеста се искачи на девет.

Како што информира директорот на Клиниката за инфективни болести, Фадил Цана, станува збор за 66-годишен пациент од Куманово со потврдена невроинвазивна форма на болеста, кој бил хоспитализиран 28 дена и бил на механичка вентилација. Пациентот имал и повеќе придружни заболувања.

Досега на Клиниката биле хоспитализирани вкупно 66 пациенти со Западнонилска треска.

„Во моментов се хоспитализирани 11 пациенти, од кои еден е со потешка клиничка слика. Последен прием на лице со западнонилска треска на Инфективна е од 19 септември“, изјави Цана.

Според последниот извештај на Институтот за јавно здравје од 10 септември, сите дотогаш починати осум лица биле од Скопје и се мажи. Просечната возраст на починатите е 71,9 година, сите биле хоспитализирани, а седум имале коморбидитети.