Членовите на Европската фудбалска унија (УЕФА) едногласно го отфрлија предлогот на Меѓународната фудбалска федерација (ФИФА) акциите од сопственоста на Светското првенство и другите натпреварувања да им се дадат на приватни инвеститори и се заканија со бојкот на Светското првенство aко ФИФА го спроведе својот план.

Сите 55 членки на УЕФА гласале за бојкот на Светското првенство доколку ФИФА спроведе план за продажба на удели од своите натпреварувања на приватни инвеститори.

Одлуката е донесена на денешниот вонреден состанок на УЕФА, кој беше свикан за да се разговара за предлозите објавени од ФИФА во вторник.

Управното тело на светскиот фудбал во вторник објави дека планира да формира подружница од 20 милијарди долари за управување со Светското првенство и другите негови натпреварувања и да понуди до 20 проценти сопственост на надворешни инвеститори.

„Ниту еден тим на УЕФА нема да учествува во ниту едно натпреварување на ФИФА додека овие предлози се на сила, освен ако овој предлог не се повлече целосно и не се дадат обврзувачки гаранции дека ФИФА никогаш повеќе нема да го отвори своето управување или натпреварувања за приватна сопственост“, се вели во соопштението на УЕФА.

„Светското првенство не може да се третира како инвестициски производ. Тоа е едно од најголемите спортски наследства на фудбалот. Изградено е од генерации играчи, тимови и навивачи на секој континент. Ниту еден дел од него никогаш не треба да им се остави на приватни инвеститори. Светското првенство не е на продажба“, заклучи УЕФА.

Соопштението следи по писмото од Претседателот на ФИФА, Џани Инфантино, кој го поставил 19 септември како краен рок за сите 211 членки да прифатат еднократна понуда од по 20 милиони долари како дел од инвестицискиот план за Светското првенство.

Во писмото до членовите на ФИФА, Инфантино навел зошто сака да основа нова подружница на ФИФА вредна 20 милијарди долари, во која 20 проценти од сопственоста би биле во рацете на приватни инвеститори. Оваа подружница би управувала со натпревари и настани под покровителство на ФИФА, како што се Светските првенства за мажи и жени и Светското клупско првенство.

Средствата за оваа понуда биле обезбедени од инвестицискиот фонд Трив Етернал (Thrive Eternal) основан од Џошуа Кушнер, брат на Џаред Кушнер, зет на Трамп, како дел од проект за продажба на акции на Светското првенство.