Претседателот на Европскиот совет, Антонио Кошта, и претседателката на Европската комисија, Урсула фон дер Лајен, се огласија откако беа повикани поради молчењето за погребот на воениот злосторник Ратко Младиќ во Белград. Тие ги опишаа снимките од погребот како шокантни.

„Ратко Младиќ беше осуден воен злосторник. Тој беше одговорен за геноцид, воени злосторства и злосторства против човештвото. Почина додека отслужуваше доживотна казна затвор за геноцидот во Сребреница и други злосторства“, рекоа тие во заедничка порака на социјалните мрежи.

Тие ја нарекоа официјалната поддршка и присуството на високи српски функционери на погребот длабоко жално.

Тие нагласија дека таков став е неуспех во справувањето со темното поглавје во поновата европска историја и е спротивен на вредностите што ја водат Србија кон членство во Европската Унија.

„Нашите мисли се со жртвите на злосторствата извршени во поранешна Југославија“, рекоа тие.

Европската комисија вчера не го осуди погребот на починатиот воен злосторник Ратко Младиќ во Белград, со образложение дека не се одржaл со државни почести, и покрај фактот што министрите во српската влада присуствувалe на погребот, а војниците го чувале ковчегот.

„Слушнавме дека е планиран погреб со државни почести, но тоа не се случи“, изјави портпаролката на Комисијата, Паула Пињо.

На инсистирање на новинарите, врз основа на што се тврди дека не е погреб со државни почести ако државните институции, армијата и министрите и државното знаме се вклучени во испраќањето, портпаролката Пињо изјави дека на Србија е да одлучи како ќе го организира погребот.

„Јасно го искажавме нашиот став“, рече таа.