Фудбалерите на Мексико ја победија репрезентацијата на Јужнoaфриканската Република (ЈАР) со 2:0 (1:0) во првиот натпревар од 23. Светско првенство, кое започна во четврток со натпревар од групата А на стадионот „Ацтека“ во Мексико Сити.

Почетокот на Мундијалот што се игра во САД, Мексико и Канада е своевидна репризата од натпреварот од отворањето на СП 2010 во Јужна Африка, кога домашната репрезентација одигра 1:1 со Мексико.

Вечерва на „Естадио Ацтека“, Мексиканците во многу подобро издание од противникот, сосема заслужено ги освоија првите бодови во групата „А“ и најавија кандидатски статус за место во нокаут рундата.

Со брз гол на Хулијан Кинонес во 9. минута, Мексико поведе со 1:0 и најави напад на три бода. Во продолжението, домашната репрезентација имаше уште две зрели шанси преку Раул Хименез и Кинонес за зголемување на водството, но ЈАР имаше среќа и замина на пауза со само еден гол во мрежата.

Во вториот дел, по подарок од противникот, Мексико можеше да постигне гол кога Кинонес ја погоди стативата.

Во 49. минута, Гутиерез излезе сам пред шеснаесетниот на противникот, а Ситхол стартуваше врз него, по што бразилскиот судија му го врачи и првиот црвен картон на шампионатот.

Во продолжение, конечно Раул Хименез во четвртиот настап на Мундијалите успеа да го постигне својот прв гол. Во 67. минута по одлично нафрлување, со глава ја смести топката во мрежата на Вилијамс.

Ова за него беше 47. гол во дресот на Мексико со кој изби и на 2. место на вечната листа.

ЈАР до крајот остана и со уште еден уграч помалку на теренот. Нововлезениот Цване беше исклучен поради удар во лицето на противнички фудбалер во 84. минута.

Во судиското продолжение по еден груб старт во контранапад на гостите стоперот на Мексико, Монтес беше испратен предвреме во соблекувалната.