Тројца државјани на Северна Македонија загинале, додека двајца други се тешко повредени во тешка сообраќајна несреќа што се случила вчера на приморскиот автопат во близина на местото Унец во Словенија.
Според првичните информации, несреќата се случила откако камион, поради дефект, бил запрен во просторот предвиден за застанување. Од засега непознати причини, автомобилот удрил во задниот лев дел од приколката на камионот.
Во возилото имало пет лица, сите македонски државјани. Лекарот на местото на несреќата ја констатирал смртта на тројца од нив, додека двајцата повредени биле пренесени во болница.
Едниот од нив, кој се здобил со тешки повреди, бил пренесен со хеликоптер, додека возачот бил пренесен со возило на брза помош.
Во меѓувреме, Министерството за надворешни работи и надворешна трговија соопшти дека Амбасадата во Љубљана добила официјално известување од словенечката полиција за несреќата.
„До Амбасадата во Љубљана е доставено официјално известување од словенечката полиција за тешка сообраќајна незгода што се случила на 27 август 2026 година на автопатот А1, во близина на Унец“, се наведува во соопштение на Министерството.
Оттаму соопштија дека Амбасадата е во комуникација со надлежните словенечки институции и го следи понатамошниот тек на постапката.
Градоначалникот на Општина Центар Жупа, пак, во меѓувреме соопшти дека тројцата македонски државјани, едно возрасно лице и две деца кои загинаа во тешката сообраќајна несреќа во Словенија се од село Житинени, Центар Жупа.
„Немам зборови со кои би ја искажал тагата од оваа страшна трагедија која ги потресе жителите на нашата општина. Семејството е по потекло од село Житинени, а живеат во Равена Италија. Се молиме, за закрепнување на другите две повредени лица“, за МИА изјави градоначалникот Аријан Ибраим.
Во автомобилот, според него биле родителите на децата и нивната баба, мајка на возачот.
Според словенечките медиуми, загинатите деца се на возраст од 4 и 11 години, а нивната баба имала 74 години. Возачот на камионот, пак, е државјанин на БиХ, стар 64 години.
Несреќата била пријавена во 16:28 часот вчера, а на местото на несреќата пристигнале полициски патроли и екипи на пожарникари.
На местото на несреќата бил извршен увид од државен обвинител и истражен судија. Полицијата се очекува да објави повеќе информации по завршувањето на истражните дејствија.
