Претседателката на Европската комисија, Урсула фон дер Лајен, во четвртокот во Подгорица изјави дека Европската Унија верува во Црна Гора како 28-ма членка и дека ќе има целосна поддршка од Брисел на тој пат.
На заедничката прес-конференција со црногорскиот премиер Милојко Спајиќ, Урсула фон дер Лајен го пофали напредокот во реформите, особено во областа на владеењето на правото.
„Мојата прва порака е дека веруваме во Црна Гора како 28. членка до 2028 година и ќе ве поддржуваме до крај. Можете да сметате на нас“, рече фон дер Лајен.
На прашањето дали политичката криза предизвикана од фактот дека опозицијата ја суспендираше соработката со парламентарното мнозинство до дебата за евентуално разрешување на претседателот на Собранието Андрија Мандиќ, бидејќи тој изрази сочувство за смртта на осудениот воен злосторник Ратко Младиќ, би можела да го загрози планот за затворање на преостанатите поглавја од преговорите до крајот на годината, таа рече дека Црна Гора сега има потреба од широка внатрешна поддршка.
„Црна Гора е лидер во процесот на пристапување во регионот и ние навистина веруваме дека можете да ги затворите сите поглавја до крајот на годината и дека можеме да влеземе во преговори за договорот за пристапување. За да стигнеме таму, ни е потребна широка поддршка од партиите за европскиот пат. Знам дека граѓаните на Црна Гора се многу европски ориентирани и сметам на тој континуитет. Треба да останеме фокусирани и да ги држиме очите на топката бидејќи има многу што да се добие“, рече фон дер Лајен.
Спајиќ: Остануваме фокусирани на резултатот
Црногорскиот премиер Милојко Спајиќ изјави дека е важно сите страни да го разберат моментот во кој се наоѓа земјата.
„Мислам дека сега е време да видиме дека сме стигнале до самиот крај. Зошто сега би направиле потег што би имал ефект на одложување? Оптимист сум и мислам дека сите страни се свесни за тоа и дека нема причина зошто сите заедно не треба да ја туркаме оваа земја кон ЕУ“, рече Спајиќ.
Тој рече дека Црна Гора е на последната етапа од своето европско патување, но дека сега нема опуштање.
„Остануваме фокусирани на резултатот. Мислам дека преостанатите неколку милји се голем предизвик, но ние сме подготвени. Веќе ги испративме повеќето поглавја до ЕК за ревизија, подготвени сме за проценки и критики, тоа е во наш интерес“, рече црногорскиот премиер, нагласувајќи дека сè уште верува дека неговата земја ќе стане членка на ЕУ до 2028 година.
Отворени прашања меѓу Хрватска и Црна Гора
Претседателката на Европската комисија најави дека Брисел наскоро ќе ги презентира таканаречените патокази за најнапредните земји-кандидатки. Патоказите, како што рече таа, ќе покажат многу конкретни чекори, што преостанало да направи секоја земја и кои се роковите.
„Со Црна Гора, секогаш сме еден чекор понапред. Сега напредува работата на подготовката на вашиот договор за пристапување. Во јуни веќе предложивме финансиски пакет за пристапување. Нашата цел е да ја подготвиме финансиската транзиција за Црна Гора од земја-кандидат во земја-членка“, нагласи фон дер Лајен.
Претседателката на Европската комисија, одговарајќи на прашањата на новинарите, рече дека е свесна за отворените билатерални прашања меѓу Црна Гора и Хрватска и дека е многу важно да се најде заемно корисно решение.
„Разговаравме за тоа билатерално. Исклучително е важно, и знам дека преговарате, да се решат овие прашања“, рече таа.
Фон дер Лајен е на турнеја низ земјите од Западен Балкан, која ја започна во среда во Тирана, по што во четврток ги посети Приштина и Подгорица, а турнејата ќе ја заврши во петок во Скопјe.
Во преговорите со Европската Унија, Црна Гора ги отвори сите 33 преговарачки поглавја, од кои досега привремено затвори 18, оставајќи ѝ да затвори уште 15.
Европската комесарка за проширување, Марта Кос, изјави во четврток дека Црна Гора е во последната фаза од преговорите и дека се очекува уште неколку поглавја да бидат затворени на следната меѓувладина конференција, која треба да се одржи кон средината на октомври.
Подгорица планира да ги затвори сите преостанати поглавја до крајот на оваа година.
