Администрацијата на претседателот Доналд Трамп се обидува да го депортира Блерим Скoро, татко на три деца роден во Косово, кој тврди дека работел во тајност за американските разузнавачки служби и дека по нападите од 11 септември се инфилтрирал во Ал Каеда, објави во средата CBS News.

Службата за имиграција и царина (ICE) го уапси 55-годишниот маж на 3 август пред канцеларија за имиграција во Њу Џерси, каде што отишол да ја обнови својата документација.

Неговите адвокати побарале од федералниот суд да ја запре депортацијата, тврдејќи дека на Скoро му било ветено право на престој по долгогодишната работа како „агент на ЦИА“.

Сега возач на такси на Стејтен Ајленд, со американска сопруга и деца, Скoро во 2022 година добил заштита од депортација.

Неговите адвокати велат дека неговата соработка им помогнала на властите да уапсат членови на Ал Каеда, Ал Шабаб и други групи.

„Никогаш не помислив дека вака ќе ме предадат“, изјави тој за CBS News од притворскиот центар во Елизабет. „Ве молам, ако умрам, сакам да умрам во оваа земја, за моите деца да можат да ме погребаат.“

Според документите на ФБИ, Скoро започнал да соработува со американските власти откако во 2000 година бил затворен поради трговија со хероин.

Од 2002 до 2006 година, додека ја издржувал казната во Пенсилванија, Скoро доставувал информации за лица осомничени за тероризам и за милитанти.

Во документите на ФБИ бил идентификуван како информатор во истрага поврзана со Осама бин Ладен, а дел од информациите што ги доставил биле опишани како „оперативно употребливи“ и „сигурни“.

Откако во 2007 година бил депортиран во Косово, Скoро рекол дека ЦИА му наложила да се инфилтрира во Ал Каеда.

Тој тврди дека од 2007 до 2009 година работел под прикритие, патувајќи низ неколку земји и посетувајќи камп на терористичката група Даеш во Сирија.

Неговиот адвокат, Џошуа Дрател, вели дека Скoро оттогаш живеел „целосно законит и продуктивен живот со своето семејство“, по, како што го опиша, „ужасувачкото искуство“ што го поминал работејќи за САД.

Скoро вели дека неговото прикритие на крајот било разоткриено и дека преживеал обид за атентат пред да се врати во САД во 2014 година. Неговиот имиграциски случај продолжил со години.

Во 2022 година, федерален судија спречил негово отстранување во Косово врз основа на Конвенцијата против тортура, иако со одлуката не му било доделено право на постојан престој.

Неговите адвокати тврдат дека ИЦЕ ја прекршила таа заштита со обидот да го депортира без претходно да добие судска дозвола.