Kryeqyteti turk Ankara ka pritur Punëtorinë e Türkiyes të nismës ‘Build Clean Now’, me synimin për ta përshpejtuar tranzicionin industrial të vendit drejt industrisë së pastër.

Në punëtori morën pjesë zyrtarë, drejtues të sektorit financiar dhe zhvillues të projekteve industriale, në një takim të organizuar nga Përshpejtuesi i Transformimit Industrial dhe ‘Boston Consulting Group’, në bashkëpunim me Ministrinë e Industrisë dhe të Teknologjisë të Türkiyes.

Diskutimet u përqendruan te sektorët e çelikut, çimentos, plehrave kimike dhe aluminit.

Punëtoria synoi të çojë përpara marrjen e vendimeve përfundimtare për investime në projektet e industrisë së pastër.

Një raport përmbledhës i programit do të përmbledhë gjetjet nga diskutimet ndërmjet sektorëve, për t’u publikuar përpara samitit të OKB-së për klimën COP31, në muajin nëntor.

Zv/ministri turk i Industrisë dhe Teknologjisë, Muhammet Kasim Gonullu, tha se programi është një partneritet kyç për transformimin e gjelbër më të gjerë të vendit.

Ai theksoi se dekarbonizimi është thelbësor për ruajtjen e konkurrueshmërisë, krijimin e mundësive të reja për investime dhe përmirësimin e pozitës së Türkiyes në zinxhirët globalë të vlerës.

Faustine Delasalle, drejtuese e partneritetit ‘Misionit Possible’ dhe drejtoreshë e Përshpejtuesit të Transformimit Industrial, tha se nisma synon të krijojë kushte tregu që t’i bëjnë projektet e dekarbonizimit të thellë të financueshme nga huadhënësit tradicional.

Ajo theksoi se vrulli global po rritet, pasi në gjysmën e parë të vitit u morën 19 vendime përfundimtare investimi për projekte të industrisë së pastër në shkallë komerciale, dyfishi i shifrës së vitit të kaluar.

Delasalle shtoi se infrastruktura prodhuese e Türkiyes, brenda asaj që ajo e quajti “brezi i ri industrial me diell”, si dhe lidhjet e saj të thella tregtare me Evropën, përbëjnë përparësi të mëdha.

Ajo tha se qëllimi kryesor në vitet e ardhshme duhet të jetë zgjerimi i projekteve të dekarbonizimit të thellë në industrinë e rëndë.