Presidenti amerikan Donald Trump tha të hënën se ka “gjasa të mira” për arritjen e një marrëveshjeje me Iranin, por paralajmëroi se Uashingtoni do të rifillojë operacionet ushtarake nëse negociatat dështojnë.

“Ata duan të takohen dhe ne po takohemi. Do të shohim se çfarë do të ndodhë. Ekziston mundësia që të arrijmë një marrëveshje”, u tha Trumpi gazetarëve.

“Pa atë që bëmë ne, ata as nuk do të bisedonin me ne”, shtoi ai.

“Po bisedojmë me Iranin tani”, tha ai. “Po zhvillojmë bisedime të mira. Do të shohim se çfarë do të ndodhë. Ka gjasa të mira që diçka të ndodhë.”

“Nëse nuk ndodh, atëherë do t’i rikthehemi asaj që po bënim dy ditë më parë”, tha ai, pa dhënë hollësi të tjera.

“Ata nuk do ta kishin kërkuar takimin nëse ne do të ishim në një pozitë të dobët. Arsyeja e vetme pse duan të takohen është sepse i kemi goditur shumë fort”, tha Trumpi.

I pyetur për pretendimin e presidentit ukrainas Volodymyr Zelenskyy se Rusia po ndante informacione satelitore me Iranin, Trumpi tha se do të kërkonte sqarime nga udhëheqësi rus.

“Do ta mësojmë së shpejti. Do ta pyes Putinin për këtë. Do ta zbulojmë”, tha ai.

I pyetur nëse është në të njëjtën linjë me kryeministrin izraelit Benjamin Netanyahu për çështjen e Iranit, me të cilin do të takohet të martën në Uashington, Trumpi tha se qëndrimet e tyre janë “mjaft të afërta”, por se “kemi një dallim të vogël”.

ShBA-ja kreu ditët e fundit një seri sulmesh në mbarë Iranin, si përgjigje ndaj atyre që i cilësoi si sulme iraniane ndaj anijeve tregtare në Ngushticën e Hormuzit. Teherani u përgjigj duke goditur objekte dhe baza që, sipas tij, përdoren nga ushtria amerikane në disa vende të rajonit të Gjirit.

Shkëmbimi i sulmeve ndodhi pavarësisht marrëveshjes kornizë të ndërmjetësuar nga Pakistani, të cilën ShBA-ja dhe Irani e nënshkruan në qershor për t’i dhënë fund luftës së nisur në shkurt dhe për t’i hapur rrugën një marrëveshjeje të qëndrueshme paqeje.