Shqipëria regjistroi mbi 9,4 milionë vizitorë të huaj në tetë muajt e parë të vitit 2026, 5,3 për qind më shumë krahasuar me të njëjtën periudhë të një viti më parë.

Të dhënat u bënë të ditura nga ministri i Turizmit, Kulturës dhe Sportit të Shqipërisë, Blendi Gonxhja.

Vetëm gjatë muajit gusht, sipas tij, Shqipërinë e vizituan mbi 2,4 milionë turistë të huaj, duke shënuar një rritje prej 2 për qind krahasuar me gushtin e vitit 2025.

Gonxhja tha se objektivi i qeverisë është që rritja e numrit të vizitorëve të shoqërohet me investime në sektorin e turizmit, zgjerim të ofertës gjatë gjithë vitit dhe zhvillim të ekonomive vendore.

Ai përmendi gjithashtu projektet për restaurimin dhe rijetëzimin e objekteve të trashëgimisë kulturore, përfshirë shtëpitë monument kulture në Gjirokastër, manastiret dhe kullat në veri të vendit.

Sipas ministrit, autoritetet synojnë gjithashtu të zgjerojnë promovimin e Shqipërisë në panaire ndërkombëtare dhe të tërheqin investime që rrisin kapacitetet dhe standardet e sektorit turistik.

Gonxhja tha se shtimi i linjave ajrore gjatë gjithë vitit dhe i fluturimeve sezonale drejt destinacioneve të reja pritet të rrisë më tej aksesin në tregje të huaja.

Qeveria synon që rritja e turizmit të përkthehet në më shumë punësim, të ardhura dhe zhvillim ekonomik në zonat turistike të vendit.