Qindra kineastë, përfshirë regjisorin e njohur Tom Tykwer, aktoren Tilda Swinton dhe ish-kryetarin e jurisë e regjisorin Todd Haynes, kanë nënshkruar një letër të hapur kundër shkarkimit të mundshëm të drejtoreshës aktuale të Festivalit të Filmit në Berlin, pjesërisht për shkak se ajo ka pozuar në një foto ku shihej një flamur palestinez, raportuan të enjten mediat.

“Si kineastë në Gjermani dhe më gjerë, po i ndjekim me shqetësim të thellë debatet aktuale rreth Festivalit Ndërkombëtar të Filmit në Berlin dhe shkarkimit të propozuar të Tricia Tuttle. Ne qëndrojmë në mbrojtje të Berlinales për atë që ajo është në thelb: një vend shkëmbimi”, citoi gazeta gjermane “Der Tagesspiegel”.

“Një fotografi e drejtuesve të festivalit me kineastë, në të cilën ishte i dukshëm një flamur palestinez, ka qenë gjithashtu objekt kritikash. Të fotografohesh me mysafirë ndërkombëtarë është pjesë e praktikës së një festivali të tillë. Dukshmëria e identiteteve të ndryshme nuk është miratim; është shprehje e një sfere publike të hapur dhe demokratike”, shtuan kineastët.

Peticionit i paraprin një mbledhje e jashtëzakonshme e planifikuar për të enjten, e thirrur nga ministri gjerman i Kulturës, Wolfram Weimer, me organin drejtues të Festivalit të Filmit të Berlinit, për të diskutuar “drejtimin e ardhshëm” të tij. Gjerësisht besohet se mbledhja është thirrur si përgjigje ndaj kritikave për deklarata politike të bëra gjatë festivalit.

“Nëse thirret një mbledhje e jashtëzakonshme për të vendosur mbi të ardhmen e drejtimit të festivalit, në lojë është më shumë se një emërim i vetëm. Çështja ka të bëjë me marrëdhënien midis lirisë artistike dhe pavarësisë institucionale”, deklaruan nënshkruesit, të cilët u zotuan “të luftojnë për një kulturë shkëmbimi, jo frikësimi”.

Më 18 shkurt, dhjetëra aktorë dhe regjisorë, përfshirë Swinton dhe Javier Bardem, akuzuan Festivalin Ndërkombëtar të Filmit në Berlin për “racizëm antipalestinez” dhe u bënë thirrje organizatorëve të shprehnin qartë kundërshtimin e tyre ndaj asaj që e quajtën gjenocid të Izraelit në Gazë.

Në një letër të hapur të publikuar në revistën “Variety”, 81 punonjës të filmit kritikuan atë që e quajtën “përfshirja e Berlinales në censurimin e artistëve që kundërshtojnë gjenocidin e vazhdueshëm të Izraelit ndaj palestinezëve në Gazë”.

Nënshkruesit shprehën gjithashtu kundërshtime ndaj komenteve të presidentit të sivjetmë të jurisë, regjisorit Wim Wenders, i cili në një konferencë të fundit për shtyp, kur u pyet për Gazën, u shpreh: “Duhet të qëndrojmë jashtë politikës.”