Ministri i Jashtëm i Iranit tha të dielën se konflikti mes ShBA-së dhe Iranit nuk ka zgjidhje ushtarake, duke shtuar se lufta nuk mund të përfundojë as përmes vendosjes së sanksioneve të tjera, në një referencë të dukshme ndaj masave të Uashingtonit kundër Teheranit.

“Nuk ka zgjidhje ushtarake dhe as zgjidhje të bazuar në më shumë sanksione”, tha Abbas Araghchi gjatë një fjalimi para ambasadorëve të huaj të akredituar në Teheran, sipas agjencisë shtetërore të lajmeve IRNA.

“Vetëm një zgjidhje e bazuar në negociata, drejtësi dhe dinjitet diplomatik mund ta trajtojë situatën dhe të sjellë një zgjidhje përfundimtare për t’i dhënë fund kësaj lufte dhe agresionit të paligjshëm të nisur kundër Republikës Islamike të Iranit”, tha Araghchi.

Ai paralajmëroi se nëse Uashingtoni ndërmerr veprime ushtarake, Teherani është i gatshëm të marrë të gjitha masat e nevojshme për “t’u mbrojtur me edhe më shumë forcë”.

ShBA-ja dhe Izraeli nisën luftën kundër Iranit më 28 shkurt. Teherani u përgjigj me sulme me raketa dhe dronë në rajon dhe praktikisht mbylli Ngushticën e Hormuzit, një rrugë strategjike për furnizimet energjetike. Më pas, ushtria amerikane vendosi një bllokadë detare ndaj porteve iraniane.

Përpjekjet për t’i dhënë fund luftës kanë vijuar që nga marrëveshja kornizë e 18 qershorit, e cila synon t’i hapë rrugë një marrëveshjeje përfundimtare paqeje që do të përfshijë lundrimin nëpër Ngushticën e Hormuzit dhe programin bërthamor të Iranit.