Disa gjeneratorë të energjisë elektrike në spitalet e Rripit të Gazës kanë ndaluar së funksionuari për shkak të mungesës karburantit, njoftoi të dielën Ministria e Shëndetësisë.
Ministria tha se disa gjeneratorë kanë ndaluar së punuari ditët e fundit, duke paralajmëruar se mungesa e karburantit për gjeneratorët po e vështirëson gjithnjë e më shumë furnizimin me energji elektrike të spitaleve.
Ministria tha se sasitë e kufizuara të karburantit që Izraeli ka lejuar së fundmi të hyjnë në Gaza janë të mjaftueshme vetëm për nevoja emergjente, ndërsa spitalet kanë nevojë për rreth 2.500 litra në muaj.
“Gjeneratorët e mbetur po funksionojnë 24 orë në ditë, në kushte të vështira teknike dhe mekanike, dhe nuk janë në gjendje t'i përmbushin nevojat për energji elektrike të të gjitha reparteve që shpëtojnë jetë”, tha ministria.
Gjeneratorët janë bërë burimi kryesor i energjisë elektrike për spitalet e Gazës, në kushtet e një ndërprerjeje të zgjatur të energjisë.
Sipas autoriteteve të Gazës, lufta e Izraelit në Gaza që nga tetori i vitit 2023 ka vrarë më shumë se 73.000 palestinezë dhe ka plagosur mbi 174.000 të tjerë, ndërsa ka shkaktuar shkatërrime të mëdha në të gjithë enklavën.
