Ministria e Mbrojtjes e Shqipërisë ka bërë të ditur se gjatë 24 orëve të fundit janë raportuar 29 vatra zjarri, prej të cilave 11 vijojnë aktive.

Drejtoria e Përgjithshme e Mbrojtjes nga Zjarri dhe Shpëtimin (MZSH) për përballimin e situatës ka angazhuar 249 efektivë, ndërsa gjithashtu në terren janë 48 forca policore, 233 forca bashkiake, të Shërbimit Pyjor, 206 vullnetarë dhe 118 efektivë të Forcave të Armatosura.

Në terren janë vendosur gjithashtu 43 automjete zjarrfikëse, ndërsa Forcat e Armatosura kanë vënë në dispozicion 9 automjete zjarrfikëse, 4 autobote, 3 ambulanca, 3 helikopterë dhe 2 avionë "Air Tractor".

Vatra aktive raportohen në 11 vende të ndryshme, ndërsa Ministria e Mbrojtjes thekson se operacionet po vijojnë në mënyrë të koordinuar nga toka dhe ajri,

Sipas ministrisë, në zonat më të ekspozuara fokusi kryesor mbetet mbrojtja e banesave dhe frenimi i përhapjes së flakëve.

Agjencia Kombëtare e Mbrojtjes Civile, përmes Qendrës Kombëtare Operacionale të Emergjencave Civile, vijon monitorimin e situatës dhe koordinimin e kapaciteteve në të gjithë vendin.