Një 19-vjeçar norvegjez është dënuar me 20 vjet burgim për komplot për vrasjen e një objektivi të paidentifikuar në Britani, në emër të një grupi kriminal të organizuar të lidhur me Iranin.
Sipas raportit nga BBC, Johannes Natland u rekrutua nga rrjeti Foxtrot, një grup kriminal i organizuar suedez që përshkruhet si i mbështetur nga regjimi iranian, për të kryer një vrasje në Angli.
Natland u shpall fajtor njëzëri për komplot për vrasje gjatë një rigjykimi dhe sot u dënua në Gjykatën Mbretërore të Woolwich-it. Ai më herët kishte pranuar fajësinë për posedim të armëve të zjarrit dhe municionit.
Ai u arrestua në hotelin Briar Court në Huddersfield, në West Yorkshire, në mars të vitit 2025. Nën shtratin e tij u gjetën dy armë funksionale dhe 19 fishekë të vërtetë, të fshehur aty. Ai kishte mbërritur në aeroportin e Mançesterit më 17 mars 2025, me një pasaportë emergjente, pak pas ditëlindjes së tij të 18-të.
Duke ndjekur udhëzime përmes videove të dërguara në aplikacionin e mesazheve Signal, ai udhëtoi drejt Huddersfieldit, ku ishin fshehur armë zjarri, një veturë e vjedhur dhe para të gatshme.
Komploti u pengua pasi policia norvegjeze arrestoi të riun që kishte rekrutuar Natlandin dhe gjeti në telefonin e tij mesazhe lidhur me vrasjen e planifikuar.
Komandantja Helen Flanagan, drejtuese e Policisë Kundër Terrorizmit në Londër, tha se autoritetet nuk kishin arritur të identifikonin viktimën e synuar.
“Nuk kemi qenë në gjendje të përcaktojmë saktësisht se kush ishte viktima e synuar”, tha ajo.
Gjatë shpalljes së dënimit, gjyqtarja Cheema-Grubb tha: “Ju u rekrutuat për të udhëtuar drejt Anglisë dhe për të vrarë një objektiv të paidentifikuar”.
“Në thelb të kësaj çështjeje qëndron një fakt i qartë. Ju pranuat të vrisnit një qenie tjetër njerëzore, një të panjohur për ju, në një vend të huaj”, shtoi ajo.
Rrjeti Foxtrot është sanksionuar nga Britania dhe SHBA-ja për lidhjet e tij me qeverinë iraniane. Grupi lidhet gjithashtu me rekrutimin e të rinjve për të kryer krime të dhunshme, një praktikë që Europol-i e ka përshkruar si “dhunë si shërbim”.
Natland u rrit në Stavanger, në jugperëndim të Norvegjisë, dhe raportohet se filloi të përdorte drogë në moshën 13-vjeçare, përpara se të linte shkollën.
Më vonë, ai përjetoi psikozë të shkaktuar nga përdorimi i drogës.
