Ndërsa pjesa më e madhe e botës politike është përqendruar te zgjedhjet e muajit të ardhshëm, që do të mbahen në mes të mandatit presidencial, gara paraprake jozyrtare për zgjedhjet presidenciale të vitit 2028 po zhvillohet në heshtje, por para syve të publikut.

Kandidatët e mundshëm presidencialë nga radhët e demokratëve dhe republikanëve po udhëtojnë në të gjithë vendin, duke mbledhur fonde dhe duke shfrytëzuar lidhjet e tyre politike për të ndihmuar kandidatët e partive të tyre, por edhe për të nxitur ambiciet e tyre për të mbërritur në Shtëpinë e Bardhë.

Më poshtë, një vështrim më i afërt mbi disa nga kandidatët kryesorë të mundshëm dhe mënyrën se si zhvillimet e 3 nëntorit mund të ndikojnë në të ardhmen e tyre politike.

Vance shton përpjekjet për fushatën zgjedhore

Ai ka nisur me një agjendë të ngjeshur elektorale në prag të zgjedhjeve të mesmandatit, duke udhëtuar nga rajoni i Mesperëndimit drejt Jugut dhe Alaskës, me fokus te përpjekjet e administratës për të luftuar mashtrimet.

Një shtet kyç do të jetë Ohajo, të cilin Vance e përfaqësoi për një periudhë të shkurtër në Senat.

Senatori republikan Jon Husted, i emëruar në vitin 2025 për të mbushur vendin e lënë bosh nga Vance, po përballet me sfidën e ish-senatorit demokrat Sherrod Brown.

Demokratja Amy Acton po zhvillon një garë të ngushtë me republikanin Vivek Ramaswamy për postin e guvernatorit.

Vëmendje e veçantë do t'i kushtohet gjithashtu efektivitetit të organizatës konservatore Turning Point Action. Erika Kirk, e veja e Charlie Kirk, bashkëthemeluesit të Turning Point, dhe drejtuesja e re e organizatës, e ka mbështetur tashmë publikisht kandidaturën e mundshme presidenciale të Vance. Drejtuesit e organizatës kanë deklaruar se synojnë ta përdorin atë për të mbështetur fushatën e tij.

Vance ka deklaruar se nuk është i përqendruar te kandidimi për president, por se po përpiqet të ndihmojë në zgjedhjen e republikanëve.

Newsom ndjek një strategji elektorale në Jug

Mandati i guvernatorit të Kalifornisë, Gavin Newsom, përfundon në fund të vitit dhe ai ka qenë ndër demokratët më aktivë gjatë fushatës për zgjedhjet e mesmandatit.

Ai i ka kushtuar vëmendje të veçantë Jugut, ku ka zhvilluar fushatë në mbështetje të kandidatëve për poste të ndryshme në shtete si Alabama, Misisipi, Karolina e Veriut dhe, natyrisht, Karolina e Jugut, ku në vitin 2028 do të zhvillohet gara e parë paraprake presidenciale e Partisë Demokratike.

Fokusi te Jugu përputhet me misionin e komitetit të tij të veprimit politik, të krijuar në vitin 2023 për të ndihmuar partinë të konkurrojë në shtetet ku republikanët kanë epërsi. Megjithatë, kjo strategji mund ta ndihmojë gjithashtu të fitojë mbështetjen e votuesve afrikano-amerikanë, një grup kyç brenda bazës elektorale të demokratëve.

Profili i tij kombëtar dhe lista e gjerë e adresave të postës elektronike e kanë ndihmuar Newsom të krijojë lidhje me zyrtarë demokratë në shtete si Nevada dhe Nju-Hampshire, ku emailet e tij për mbledhjen e fondeve kanë sjellë një rritje të ndjeshme të donacioneve.

Ndoshta kontributi më i madh i Newsom në zgjedhjet e mesmandatit ka qenë mbështetja për Propozimin 50, kundërpërgjigjja e Kalifornisë ndaj riorganizimit të hartës zgjedhore në Teksas, të ndërmarrë nga republikanët në mesin e dekadës.

Votuesit në Kaliforni e miratuan propozimin vitin e kaluar, duke krijuar një hartë të re të distrikteve zgjedhore për Kongresin, e cila mund t'u mundësojë demokratëve të fitojnë deri në pesë vende të tjera në Dhomën e Përfaqësuesve të ShBA-së në Kaliforni këtë vjeshtë.

Shapiro përqendrohet te Pensilvania

Mes demokratëve që konsiderohen kandidatë të mundshëm për zgjedhjet presidenciale të vitit 2028, guvernatori i Pensilvanisë, Josh Shapiro, i ka përqendruar kryesisht aktivitetet e tij politike në prag të zgjedhjeve të mesmandatit brenda shtetit që drejton.

Ai nuk ka vizituar asnjë nga shtetet ku zhvillohen garat e para paraprake presidenciale dhe as nuk ka bërë fushatë me kandidatë të tjerë në zgjedhjet e mesmandatit jashtë shtetit të tij.

Kjo qasje pasqyron përqendrimin e Shapiros te konsolidimi i pozicionit të tij politik në Pensilvani, një shtet vendimtar ku demokratët dhe republikanët konkurrojnë ngushtë në zgjedhjet presidenciale.

Shapiro konsiderohet favorit për të fituar një mandat të dytë si guvernator, përballë kundërshtares së tij republikane, arkëtares së shtetit, Stacy Garrity, dhe i ka orientuar burimet politike drejt garave të tjera zgjedhore.

Beshear përballet me rreziqe dhe mundësi

Në cilësinë e kryetarit të Shoqatës së Guvernatorëve Demokratë, guvernatori i Kentakit, Andy Beshear, i ka zgjeruar aktivitetet e tij politike në nivel kombëtar gjatë fushatës për zgjedhjet e mesmandatit.

Ai do të udhëheqë një turne në shtete kyçe për të nxitur pjesëmarrjen në votime, i cili do të nisë në Nevada më 22 tetor.

Ai ka zhvilluar gjithashtu një turne kombëtar për promovimin e librit të tij, duke shfrytëzuar rastin për të forcuar lidhjet me demokratë me ndikim në shtetet ku zhvillohen garat e para paraprake presidenciale.

Megjithatë, vendimet e Beshear për shpenzimet në cilësinë e drejtuesit të shoqatës së guvernatorëve gjatë vitit 2026 mund të përfaqësojnë njëkohësisht rrezikun dhe mundësinë më të madhe për të, përpara garës presidenciale të vitit 2028.

Ai ka qenë aktiv në mbështetjen e kandidatëve demokratë në shtete tradicionalisht të luhatshme, si Uiskonsini, Miçigani dhe Arizona, ndërsa ka zgjeruar përpjekjet edhe në shtete ku republikanët kanë epërsi, si Ohajo dhe Ajova. Sipas tij, këto shtete mund të jenë vendimtare në fushatën e ardhshme presidenciale.

Por demokratët në shtete të tjera po kërkojnë më shumë burime financiare dhe e kanë paralajmëruar Beshearin se mund të përballet me pasoja politike nëse nuk arrin rezultatet e pritshme.

Nën presion, shoqata e guvernatorëve dërgoi këtë javë një milion dollarë për të ndihmuar Gina Hinojosan, kandidaten për guvernatore të Teksasit.

Cruz zhvillon fushatë në Teksas

Senatori Ted Cruz ka qenë prej kohësh ndër aktivistët më të angazhuar të fushatave dhe mbledhësit më të zellshëm të fondeve në partinë e tij. Kjo nuk ka ndryshuar, ndërsa ai po shqyrton hapur mundësinë e një tjetër kandidimi presidencial.

Komiteti i tij i veprimit politik ka shpenzuar më shumë se 2,4 milionë dollarë këtë vit për reklama në mbështetje të kandidatëve në zgjedhjet e mesmandatit, sipas AdImpact, kryesisht për të ndihmuar kandidatin për Senat Ken Paxton në shtetin e tij, Teksas.

Cruz ka udhëtuar tri herë drejt Ajovës, shteti i parë në kalendarin e procesit të përzgjedhjes së kandidatit republikan për president, ku ai fitoi garën paraprake të republikanëve në vitin 2016.

Javën e ardhshme ai do të jetë në Alaskë, ndërsa po planifikon gjithashtu udhëtime në Karolinën e Jugut, Karolinën e Veriut dhe, me shumë gjasë, në Miçigan.

Pritzker përdor fuqinë financiare në mbështetje të kandidatëve në mbarë vendin

Guvernatori i Ilinoisit, JB Pritzker, po synon të fitojë një mandat të tretë në zgjedhjet e nëntorit, por demokrati e ka përqendruar vëmendjen më shumë te mbështetja e kandidatëve në shtete të tjera.

Ekipi i Pritzker ka deklaruar se demokrati miliarder ka dhuruar tashmë 38 milionë dollarë për përpjekjet elektorale të partisë në zgjedhjet e mesmandatit.

Krahasuar me kandidatët e tjerë të mundshëm për vitin 2028, Pritzker është përqendruar veçanërisht te gara për guvernator në Teksas, ku këtë javë dhuroi një milion dollarë, pas një kontributi të mëparshëm prej 200 mijë dollarësh.

Ai ka qenë gjithashtu aktiv në një sërë aktivitetesh dhe takimesh publike, duke marrë pjesë në më shumë se 75 veprimtari në të gjithë vendin. Pritet të vizitojë Karolinën e Jugut përpara ditës së zgjedhjeve.

Politikat progresiste të AOC-së përballen me një provë

Anëtarja e Dhomës së Përfaqësuesve nga Nju Jorku, Alexandria Ocasio-Cortez, e njohur si AOC, është shprehur gjithnjë e më hapur për mundësinë e kandidimit për presidente, gjë që mund ta pozicionojë mes kandidateve progresiste të Partisë Demokratike.

Por fillimisht, ajo po përpiqet të dëshmojë se kjo linjë politike mund të ketë sukses në një shtet vendimtar për zgjedhjet presidenciale, si Miçigani, ku ajo ka dhënë mbështetjen e saj të fuqishme për kandidatin për Senat, Abdul El-Sayed.

Ata u shfaqën së bashku këtë javë në një aktivitet për mbledhjen e fondeve në Nju Jork, ku Ocasio-Cortez e paraqiti fushatën e tij si një provë më të gjerë për lëvizjen progresiste.

“Nëse Abdul fiton në Miçigan, çdokush mund të fitojë kudo”, u tha Ocasio-Cortez të pranishmëve.

Ocasio-Cortez dhe demokratë të tjerë kanë pranuar se asaj do t'i duhet të përballet me pyetje nëse mund të fitojë mbështetjen e votuesve në të gjithë vendin.

Ajo argumenton se një fitore e El-Sayed mund të vërë në pikëpyetje disa nga këto supozime.

Edhe Buttigieg është i angazhuar në fushatë

Që prej largimit nga posti i sekretarit të Transportit në administratën e presidentit Joe Biden, Pete Buttigieg e ka shfrytëzuar kohën për të udhëtuar në të gjithë vendin, për të mbledhur fonde dhe për të bërë fushatë në mbështetje të kandidatëve demokratë që garojnë këtë vit.

Buttigieg ka mbështetur publikisht afro 100 kandidatë, nga garat për legjislaturat e shteteve deri te zgjedhjet për Senat, dhe është shfaqur në fushatë me rreth gjysmën e tyre, sipas ekipit të tij. Që nga largimi nga detyra, ai ka vizituar 37 shtete.

Shtrirja e këtyre aktiviteteve pasqyron gjithashtu përpjekjet e tij për të krijuar lidhje me grupime të ndryshme brenda Partisë Demokratike.

Buttigieg ka zhvilluar fushatë edhe për kandidatët demokratë në zona tradicionalisht republikane, përfshirë Nancy Lacore-n, kandidaten për Dhomën e Përfaqësuesve të ShBA-së në Karolinën e Jugut, me të cilën bëri fushatë në gusht.

Ossoff e vë kandidaturën e tij në provë në Xhorxhia

Senatori nga Xhorxhia është i vetmi demokrat që kërkon rizgjedhjen në një shtet të cilin Donald Trump e fitoi në vitin 2024, ndaj zgjedhjet e mesmandatit janë vendimtare për të.

Gjatë vjeshtës, ai ka zhvilluar një përballje të vazhdueshme politike me kundërshtarin e mbështetur nga Trump, Mike Collins, duke i paraqitur konfliktet e interesit të administratës si probleme që ndikojnë në koston e jetesës, inteligjencën artificiale dhe luftën.

Sondazhet e nxjerrin Ossoff-in 7 deri në 10 pikë përpara. Instituti Cook Political Report e vlerëson garën si një garë ku demokratët kanë epërsi, ndërsa ai ka mbledhur tashmë afro 100 milionë dollarë. Votimi i hershëm nis javën e ardhshme.

Ai këmbëngul se bisedat për një kandidim presidencial janë thjesht fantazi.

“Nuk kam aspak interes të kandidoj për president në vitin 2028”, i tha ai muajin e kaluar një televizioni lokal, duke e përsëritur këtë qëndrim edhe në daljet e tij në mediat kombëtare.

Ai ka organizuar aktivitete për mbledhjen e fondeve për Partinë Demokratike të Xhorxhias dhe fushatën e saj të përbashkët zgjedhore, është shfaqur së bashku me kandidaten demokrate për guvernatore, Keisha Lance Bottoms, dhe këtë javë siguroi mbështetjen e Obamës përmes një reklame elektorale.

Një demokrat i nivelit të lartë në Xhorxhia i tha gazetës Financial Times se synimi i Ossoff-it nuk është thjesht të fitojë, por të fitojë me një diferencë aq të madhe saqë “të mund të ndryshojë mendje në vitin 2028 ose më vonë”.

Në tregjet e parashikimeve, ai është tashmë favoriti për të siguruar nominimin e demokratëve për president.

Rreziku është i njëjtë me atë që e bëri të dukej i cenueshëm një vit më parë. Në Xhorxhia, një kandidat duhet të marrë të paktën 50 për qind të votave për të shmangur një raund të dytë zgjedhor në dhjetor. Collins po e sulmon Ossoff-in duke e paraqitur si një radikal të privilegjuar, të lidhur me elitat e zonave bregdetare. Një fitore e ngushtë do t'i bënte bisedat për ambiciet e tij presidenciale të vitit 2028 të dukeshin si të ekzagjeruara.