Forcat e sigurisë së Jordanisë kanë arrestuar tre të dyshuar në lidhje me një sulm të fundit me armë ndaj një kishe.

Zëdhënësi i qeverisë, Mohammad al-Momani tha në një deklaratë të publikuar në platformën X të kompanisë amerikane të mediave sociale se të dyshuarit u arrestuan në një shtëpi të braktisur në provincën Karak, në jug të vendit.

Sulmi i së premtes kishte në shënjestër personat që merrnin pjesë në një varrim në Kishën Hamoud në Karak, ku u vranë nëntë persona dhe u plagosën 25 të tjerë. Al-Momani tha se të dyshuarit hapën zjarr ndaj forcave të sigurisë gjatë një operacioni bastisjeje.

Ai shtoi se ata u neutralizuan gjatë përleshjes që pasoi dhe u kapën të plagosur. Asnjë pjesëtar i forcave të sigurisë nuk u plagos gjatë operacionit. Sipas tij, në vendngjarje u sekuestrua sasi e madhe armësh dhe municionesh.

Drejtori i Sigurisë Publike të Jordanisë, Obaidallah Maaytah tha se të tre personat nuk e kishin planifikuar paraprakisht sulmin, por kishin vendosur ta kryenin atë ndërsa ndodheshin pas kortezhit mortor. Ai theksoi se dy nga sulmuesit ishin vëllezër ndërsa i treti ishte kunati i tyre. Ai ia atribuoi sulmin përqafimit të “ideologjisë ekstremiste dhe terroriste” nga ana e tyre.

“Të tre u larguan nga vendngjarja me një automjet, të cilin autoritetet e sekuestruan më vonë”, tha Maaytah.

“Ekipet e sigurisë kaluan tri ditë duke kontrolluar zona të caktuara, përfshirë fshatra, terrene malore dhe lugina të thepisura, ndërsa rrethuan zonën, ngritën pika kontrolli dhe patrulla si dhe përdorën dronë për të gjurmuar sulmuesit”, tha ai.

Maaytah shtoi se pas mesnatës, forcat e sigurisë e ndanë një fshat në sektorë dhe kontrolluan shtëpitë e braktisura, përpara se të gjenin ndërtesën ku sulmuesit ishin barrikaduar. Të tre u arrestuan pas një përleshjeje të armatosur dhe u dërguan në spital me plagë, ku vazhdojnë të marrin trajtim mjekësor përpara se të nisë marrja e tyre në pyetje, vijoi ai.

Ministri i Brendshëm, Mazin Al Farrayeh tha se kapja e sulmuesve nuk nënkuptonte përfundimin e hetimeve. “Autoritetet do të vazhdojnë të hetojnë të gjitha rrethanat e sulmit dhe do të mbajnë përgjegjës këdo që rezulton se ka marrë pjesë në planifikimin, nxitjen, ndihmën ose lehtësimin e tij”, tha ai.

Ministri tha se lufta kundër terrorizmit kërkon trajtimin e shkaqeve rrënjësore të ekstremizmit, gjuhës së urrejtjes dhe nxitjes së dhunës.

Më herët sot, mbreti Abdullah II tha se “terroristët nuk do t’i shpëtojnë ndëshkimit, as kushdo që ka një ideologji që përçan jordanezët”. Pas sulmit, Jordania shpalli tri ditë zie kombëtare ndërsa flamujt u ulën në gjysmështizë në ministri, zyra qeveritare dhe institucione publike.